Шаһар басшысы Айбек Кәрімов Мұрат саяжай алқабының тұрғындарымен арнайы кездесу өткізді. Кездесуде саяжай кооперативінің құрамына кіруге құқылы жер телімдері иелерінің санын анықтау үшін құрылған арнайы комиссияның атқарған жұмысы жайлы ақпарат берілді. Сол арқылы кооперативтің жаңа басшысын сайлау мәселесін шешуге қатысты ұсыныстар айтылды.
Жиынның негізгі бөлігі басталмай тұрып – ақ Айбек Мүталапханұлы халықтың көкейінде жүрген сауалдарға жауап берді. Қойылған сауалдың біріншісі Цементшілер кентіндегі Глинка көшесін жарықтандыруға қатысты болды. Бұл көшені жарықтандырудың жағдайын қала басшысы:
— Біз қазір бұл бағытта жұмыс жасап жатырмыз. Біраз бөлігін қалпына келтіріп те қойдық. Алайда шаруа толық аяқталған жоқ. Себебі, кезінде Глинка көшесінің жарықтандыру желісі жекеменшікке өтіп кеткен. Алдағы уақытта заңға сәйкес жарықтандыру желісі коммуналдық иелікке қайтарылған соң, жарық беру қалпына келтіріледі, — деп жауап берді.
Тұрғындар тарапынан қойылған тағы бір сауал қаладағы қоғамдық көліктің қозғалысына қатысты болды. Дәлірек айтқанда, автобустар мен шағын автобустардың кешкі сағат сегізден кейін мүлдем жүрмейтіні туралы сөз қозғалды. Бұл сұраққа да қала басшысы өзінің нақты жауабын берді:
— Жолаушы тасымалдаушылармен жасалған келі-сімдер бойынша барлық бағыттағы автобустар сағат 22:30-ға дейін жүрулері керек. Бізде бұл салада арнайы мониторинг жүргізумен айналысатын «Жолаушы тасымалдарын бақылау орталығы» деп аталатын кәсіп- орын бар. Мониторинг жүргізіп, келісімге сәйкес міндеттемелерін дұрыс атқармаған тасымалдаушылармен келісімді бұзу керек. Тіпті, бәсекелестік ортаны қалыптастыру үшін жолаушы тасымалдаумен айналысатын коммуналдық кәсіпорын құрсақ деген ойымыз бар. Тек, оны жүзеге асыру үшін монополияға қарсы комитеттің рұқсатын алуымыз керек. Қазір қала әкімшілігі мен комитет арасында бұл бағытта келіссөздер жүргізіліп жатыр. Егер біздің ұсынысымыз қолдау тауып, орындалып жатса, аталған мәселе шешімін табады деп ойлаймын.
Жиынның негізгі бөлігінде Мұрат саяжай кооперативіне мүшелікке кіруге құқылы жер телімдері иелерінің санын анықтау үшін құрылған арнайы комиссияның атқарған жұмысы жайлы ақпарат берілді.
— Комиссия жұмысына жер қатынастары бөлімінің тигізген көмегі үлкен болды. Жалпы, қазір пайдаланылып жатқан 828 жер телімі анықталды. Олардың 27-нің иелерін таппадық. Қалған 801 жер телімінің тек 548-не ғана қатысты жер актілері бар екені анықталды. Демек, қазіргі таңда кооперативке мүшелікке енуге осы 548 жер телімінің иелерінің құқығы бар,- деді комиссия төрағасы саяжайшы Алексей Коновалов. Сондай-ақ, жер актілері жоқ 270-ке тарта жер телімі иелерімен жұмыс жасап, құжаттары рәсімделгеннен кейін оларды кооперативке мүшелікке қабылдау туралы ұсынысын жеткізді. Себебі, пай төлемдерін төлейтіндердің саны көп болса, кооперативке түсетін қаражаттың да мөлшері сәйкесінше артады. Ал, бұл өз кезегінде Мұрат саяжай алқабындағы қордаланған түйткілді жайттарды шешуге оң әсерін тигізбек. Оның ішінде жарықтандыру мәселесі де бар. Мысалы, жер телімдерін түгендеу барысында саяжай алқабындағы 300-ден астам үйде жарық жоғы анықталған көрінеді. Осының бәрін айта келе, Алексей Коновалов тұрғындар тарапынан келіп түскен тағы бір ұсынысты жеткізді:
{jcomments on}- Кооперативке мүшелікке енудің келісімшарттық жүйесін жасауымыз керек. Яғни, саяжайларын тұрақты баспана ретінде пайдаланатындар мен саяжайларын бағбандықпен айналысу мақсатында пайдаланатындар үшін көрсетілетін қызметтер тарифтері пайдалану мақсатына сәйкес болуы тиіс. Тағы бір айта кетерлік жайт, төленген пай төлемдерін жалақы беруге жұмсамауымыз керек. Себебі, бұл «Кооперативтер туралы» Заңда көрсетілмеген. Түскен қаражаттың барлығы кооперативті дамытуға жұмсалуы тиіс. Осылай істегеніміз бәрімізге пайдалы болады.
Сондай-ақ, кездесуде кооператив басшылығын сайлауға қатысты мәселе көтерілді. Бұл орайда қазіргі төрайымның атқарған жұмыстары туралы есебін тыңдау керектігі айтылды. Ол үшін шілденің 13-і күні кооператив мүшелерінің кезектен тыс отырысын өткізу туралы шешім қабылданды. Қазіргі төрайымның тындырған шаруалары тұрғындардың көңілдерінен шықпаған жағдайда жаңа төрағаны сайлау өткізілетіні сөз болды. Бұл орайда қала басшысы Айбек Кәрімов өз ойын былайша жеткізді:
— Сайлау өткізу үшін, өздеріңіз білесіздер, есеп комиссиясын тағайындау керек. Арнайы жәшік пен сайлау бюллетеньдерін дайындау қажет. Сондай-ақ, кооперативтің жаңа төрағасын сайлауға кооператив мүшелерінің кем дегенде жартысы қатысуы керек. Олай болмаған жағдайда сайлау заңсыз деп саналады. Нәтижелері есепке алынбайды. Сіздер бұл мәселеге намқұрайлы қарамаңыздар. Кооперативтің жаңа төрағасын сайлауда жауапкершілік танытыңыздар.
Сондай-ақ, Айбек Мүталапханұлы саяжай кооперативінің толыққанды өкілетті басшылығы анықталғаннан кейін ғана саяжай алқабының инфрақұрылымына қа-тысты мәселелерді шешу бойынша жүйелі жұмыстар атқаруға мүмкіндік туатындығын жеткізді.
Мирас ҚҰСАЙЫН,
«Семей таңы»
