Елбасымыз Н.Назарбаев 2013 жылдың желтоқсанында «Қазақстан Республикасындағы кәсіптік және өзге де мерекелер туралы» 1998 жылы қабылданған Жарлығына толықтыру енгізіп, маусым айының 23-і Мемлекеттік қызметкерлер күні болып белгіленді. Бұл мереке Семей қаласында да атап өтілді.
Мемлекеттік мекеме қызметкерлері төл мерекесінің салтанатты жиыны қалалық әкімдікте өтті. Оған қала әкімі аппаратының басшысы Шаған Жұмақсанов, қалалық мәслихаттың хатшысы Бейсенбек Ақжалов, дербес бөлім басшылары, мемлекеттік қызметкерлер қатысты.
Семей қаласы әкімі аппаратының құжаттамалық қамтамасыз ету және бақылау бөлімінің бас маманы Мадияр Байтабанов, жетекші мамандары Гүлнар Орумбаева, Эльмира Айтқазиналар мемлекеттік қызмет атқаруды қоғам мен мемлекет тарапынан айырықша сенім білдіру ретінде бағалап, Қазақстан халқы алдындағы өздерінің биік жауапкершіліктерін сезіне отырып, елдің Конституциясы мен заңнамасын сақтауға, халқымызға адал қызмет етуге салтанатты түрде ант етті.
Алғашқы болып сөз алып, мереке иелеріне жылы лебізін арнаған Шаған Манапұлы мемлекеттік қызметтің ел алдындағы аса абыройлы да жауапты жұмыс екендігін баса айта келіп, Мемлекет басшысы Н.Назарбаевтың «Біз өзіміздің халықтың қызметшісі екенімізді ұмытпайық. Мансапқорлық көрсетпей, халыққа жақын, әр істе әділ болып, қолдан келгенше түсініп, дұрыс жауап беріп, шығарып салу – парызымыз» деген сөзін тағы бір еске салды. Ал, ардагерлер кеңесінің төрағасы Амантай Доғалақов өз қызметтік тәжірибесімен бөлісе келе, дана халқымыздың «Ұлық болсаң, кішік бол» деген қағидасын бетке ұстап, қай істе болмасын кісілік танытуға шақырды. Барша мереке иелерін шын жүректен құттықтап, еңбектеріне жеміс, отбасына амандық, зор денсаулық тіледі.
{jcomments on}Өз кезегінде ант қабылдаған қызметкерлер атынан жиылған қауымға алғысын білдірген Мадияр Дәулетұлы:
-Тәуелсіз еліміздің тарихында тұңғыш рет аталып отырған Мемлекеттік қызметкерлер күні біздің мемлекеттік қызметке алғаш келіп, ант қабылдауым осындай тарихи оқиғамен тұспа-тұс келгеніне қуаныштымын. Бүгінгі күні мемлекеттік қызметтің қоғамдағы рөлі мен орны бөлек. Осы мерекенің кәсіптік мереке ретінде аталып өтілуі бір жағынан халықтың бізге сенім артқанының, қолдауының айғағы болса, екінші жағынан бізге қосымша жауапкершілік артып, алдағы жұмысымызға асқан жауапкершілікпен қарап, талмай еңбек етуге бірден-бір себеп болары анық. Қабылдаған антымызды қызметіміздің әр күні жадымыздан шығармай, еліміздің ертеңі үшін тер төгіп, жұмысымызды адал атқарамыз деп сөз береміз,- деді.
Әйгерім СӘРСЕНҒАЛИ,
«Семей таңы»
