Қостанай облысындағы Әулиекөл ауданынан басталған алапат өрт бүкіл ел тұрғындарын бейжай қалдырмауда. Төтенше жағдай министрлігінің ресми өкілі Талғат Уәлидің мәлімдеуінше, өрт ошақтары бақылауға алынды. Қазір 4 өрт ошағында, атап айтқанда, Аманқарағай, Лесное, Бағаналы және Озерное ауылдарында өртті ауыздықтау жұмыстары жалғасып жатыр. Тұрғындар эвакуацияланды. Шұғыл желі іске қосылып, аталмыш облыс бойынша төтенше жағдай жарияланды. Қазір әр өңір өрттен зардап шеккендерге гуманитарлық көмек көрсете бастады. Бұл игі іске семейліктер де ат салысып жатыр. Өртті сөндіру үшін Семей қаласы арнайы инженерлік техникалар жіберді.
