Елімізде алғаш рет 1200 шақырымнан асатын «Ұлы дала жорығы» атты 12 күндік марафон-бәйге өтеді. Бұл туралы Мәдениет және спорт министрі Дәурен Абаев өзінің facebook парақшасындағы арнайы бейне-үндеуінде жариялады.
— Өздеріңізге белгілі, халқымыз үшін жылқы жануарының орны бөлек. «Түбіміз – түркі, түлігіміз — жылқы» дейтін қазақ атамыз тұлпарды ерекше қадірлеген. Қазақ даласында ежелгі Ботай қонсында жылқының қолға үйретілгені археологиялық қазбалар арқылы дәлелденді. Бүгінде әлем Алаш баласын арғымақты алғаш ерттеген ел деп таниды. Осы ретте сол көшпенді бабаларымыздың заңды мұрагері ретінде ат спорты мен ат туризмін заманға сай жаңғырту мақсатында жаңа жобаны қолға алдық, — деді Дәурен Абаев.
«Ұлы дала жорығы» аламан-марафонына қатысушылар қыркүйектің 18-інде елордадан шығып, киелі Түркістанға 12 күн ішінде жетуі қажет. Бұл ретте, Мәдениет және спорт министрі жігіттердің жігерін сынайтын, қазанаттардың қажыр-күшін көрсететін марафон-бәйгеге барша қазақ жұртын жанкүйер болуға шақырды.
Дәурен Абаевтың айтуынша, бүгінде дүниежүзі елдері ат жарысының түр-түрін өткізеді. АҚШ-та, Еуропада, басқа да мемлекеттерде қысқа және ұзақ қашықтыққа арналған бәйге көп. Бірақ сол жарыстардың ішіндегі ең ұзақ қашықтық 160 шақырымнан аспайды екен. Соның бәрін саралай келе, министрлік қашықтығы 1 200 шақырымнан асатын «Ұлы дала жорығы» атты 12 күндік аламан жарыс, марафон-бәйге ұйымдастыруды қолға алып отыр.
Бұл – Қазақстанда бұрын-соңды болмаған, әлемде теңдесі жоқ марафон-бәйге. Сондай-ақ бұл аламан жай ғана ат жарысы емес. Қазақ халқының салт-дәстүрін жаңғыртып, рухын оятатын, Қазақстанның бай табиғаты мен тарихын зерделейтін, жаңа туристік маршруттарды қалыптастыратын тың жоба болмақ.
Дәурен Абаевтың айтуынша, аталған марафон-бәйге бағытын таңдауда ұзақ ойлануға тура келген.
– Бұл егемен еліміздің тарихында ең ұзақ қашықтықтағы аламан болғандықтан, еңселі елордамыздан бастау алып, киелі Түркістан шаһарына қарай аттанғанын жөн көрдік. Марафоншылар мәреге 12 күн ішінде атпен жетуі тиіс. Осындай ұзақ жолға мойымаған шын мықтылар қомақты жүлдемен марапатталады. Марафон-бәйгеге әр өңірден бір-бір команда шақырамыз. 5 шабандоздан құралған командалардың әрқайсысы өз аймағының намысын қорғауы тиіс,– дейді министр.
Аталған жарысқа қатысу үшін qazanat.com сайтында өтінім қалдыру қажет. Аламанның толық шарттары мен ережесі де осы сайтта көрсетілген. Іріктеуден өткен 20 команда 18 қыркүйекте Нұр-Сұлтан қаласынан «Ұлы дала жорығына» аттанады.
