Өткен демалыс күні «Қазақ аналары – дәстүрге жол» республикалық қоғамдық бірлестігінің қолдауымен Қазақстанның әр өңірлерінде өтіп жатқан ақ кимешекті қазақ аналарының шеруі Семей қаласында да болып өтті.
Ұлттық құндылықты ұлықтап, төл дәстүрді дәріптеу мақсатындағы республикалық осынау жобаның негізін қалаушы – қазақ эстрадасына ұлттық бояу сіңіріп жүрген әртіс, продюсер, көп балалы ана Айнұр Жүгінісова.
— Бүгінгі таңда «Қазақ аналары – дәстүрге жол» атты аналар шеруі келешек ұрпаққа арналған рухани құндылықтарды жандандыру мақсатында еліміздің әр өңірінде өтуде. Біз өз қаламызда да асыл аналарды, ұлт ертеңі үшін ұрпақ қамын ойлаған қыз-келіншектердің басын қосып, Абай атамыздың атындағы мешітінен бастап шеру жасайық деп шештік. Қала тұрғындарына ұлттық үлгідегі сәнді киім-кешектерді көрсетейік, насихаттайық деген бастамамызды қарапайым жандар, үйдегі анадан бастап, кәсіп бастап отырған әйелдер де, ақ жаулықты зейнеткер апаларымыз да қолдап, арнайы келіп отыр. Бірлестікте халқымыздың салт-дәстүрлеріне тоқталып, әңгіме өрбітіп, жас ұрпағымызға ұлттық мұраны жеткізуге тырысамыз. Салт-дәстүрімізді білу – бұл өткенімізді ұмытпау, құндылықтарымызды сақтай отырып, болашаққа жол тарту, — дейді бұщ орайда бірлестіктің Семей қаласындағы белсенді мүшесі, ораторлық өнер курсы орталығының жетекшісі Райхан Ахметова.
Абай Құнанбайұлы атындағы жаңадан салынған мешітте басталған аналар шеруі орталық алаңда да жалғасын тапты. Шеруге жиналған аналар мен қыз-келіншектер осынау орындарда барша қала тұрғындарына ұлттық нақыштағы киім үлгілерін көрсетті. Ақ кимешекті аналар қаладағы Абай ескерткішіне барып, тағзым етіп қайтты.
Кербез ДУЛАТҚЫЗЫ,
«Семей таңы»
