Еліміз бойынша ерлер арасында Tartyl Fest республикалық турникке тартылу фестивалі өтіп жатыр. Осыған дейін Өскемен қаласында болып өткен аталмыш спорттық байқау, өткен демалыс күндері Семей шаһарында да ұйымдастырылды. «Арена» мәдени спорт кешеніндегі осынау шараға жалпы саны 374 адам қатысты.
Семейлік спортшылар қауымы да жеңіл атлетика бойынша үздік өнер көрсете алады. Бұл орайда қала бойынша өз бағын сынап көруге бел шешкен жандар турникке тартылу арқылы шеберліктерін паш етті. Алайда, олар Қарағанды қаласында 50 рет тартылып, ел бойынша рекорд отнатқан Евгений Намды басып оза алмады.
«Арена» мәдени спорт кешенінде қатысушыларды тіркеу сағат 9:00-ден 11:00-ге дейін жалғасқан болатын. Сағат 14:00-де ашылу салтанаты болып өтіп, қатысушылар кезекпен турникке тартыла бастады. Аталмыш шараға Семей қаласы әкімінің орынбасары Дмитрий Гариков те арнайы келіп қатысты.
Спорттың бұл түрі сырт көзге оңай болып көрінгенімен жоғары деңгейдегі даярлықты талап етеді. Осы ретте талабымен танылып, ең үздік атанғандарға тоқталып өтсек, 18-30 жас аралығында 65 келіге дейінгі салмақта өнер көрсеткен Мағжан Ораз болды. Ол 40 рет тартылып, өзгелерден оқ бойы озық шықты.
Сонымен қатар, Семейде өткен фестиваль жеңімпаздары қатарында 18 жасқа дейінгі (55 келіге дейінгі салмақта) қатысушылар арасында 1-ші орынды Ералы Тұрсынов айқын басымдылықпен жеңіп алды. Тоқтала кетер болсақ, 1 орын – 200 мың теңге, 2 орын – 100 мың теңге, 3 орын – 50 мың теңге. Ал, республикалық байқаудың ең соңғы гранд финалының жүлде қоры: 1 орын – 3 млн теңге, 2 орын – 2 млн теңге, 3 орын – 1 млн теңге.
Фестивальді ҚР Президенті жанындағы «Дара» дарындыларды қолдау қоры ұйымдастырып отыр. Айта кетерлігі сол, Семей еліміз бойынша осынау фестивальді қабылдаған 19-шы шаһар екен. Енді гранд-финал 6 қыркүйек күні елорда төрінде өтеді.
Әлібек КЕМЕЛХАН,
«Семей таңы».
