Жуырда ШҚО орталығы Өскемен қаласына арнайы жұмыс сапарымен Экология, геология және табиғи ресурстар министрлігінің ведомство басшысы Серікқали Брекешев келді. Жергілікті жұртшылықпен кездесу өткізген сала басшысы бірқатар мәселелерді ортаға салды.
Алдағы уақытта Экология, геология және табиғи ресурстар министрлігіне су заңнамасын жетілдіру бойынша ұсыныстар жіберуге болады. Бұл туралы мәртебелі мейман ШҚО өңірлік коммуникациялар қызметінде өткен жиын барысында кеңінен айтып өтті.
Өз сөзінде министр шығыс өңірінің табиғи ресурстарына тоқтала келе, су шаруашылығы нысандарының тозуы және су көлемінің үлкен шығыны жайлы да кеңінен айтып өтті. Бұл орайда туындаған мәселеге байланысты, бүгінгі таңда облыста су инфрақұрылымын қайта жаңарту, суару арналарын цифрландыру жұмыстары жүргізіліп жатыр екен.
– 2017 жылдың басында елімізде апатты жағдайда тұрған 41 су қоймасы болған еді. Соңғы бес жылда оның 16-сы жөнделді. Биыл алты құрылыс қалпына келтіріледі, ал 2025 жылға дейін тағы 19 су қоймасын жаңарту жоспарлануда, оның ішінде 2023 жылдың соңына дейін Шығыс Қазақстан облысындағы екі апатты су қоймасын жөндеу жоспарлануда. Яғни, Зайсан ауданындағы «Үйдене» су қоймасын салу және Тарбағатай ауданындағы Қарғыба өзеніндегі бөгетті қайта жөндеу жұмыстарын бастау қажет. Нәтижесінде үш елді мекенді су басу қаупі төмендейді және суармалы жерлердің ауданы 13 мың гектарға ұлғаяды. Мемлекет басшысының тапсырмасы аясында су заңнамасын жетілдіру бойынша жұмыстар жүргізіп жатырмыз. Бүгінде жаңа Су кодексінің және ілеспе заң жобасының тұжырымдамалары әзірленді, олар талқылау үшін «Ашық нормативтік құқықтық актілер» порталында орналастырылған. Егер су заңнамасын жетілдіру бойынша ұсыныстарыңыз болса, оларды бізге жібере аласыз, – деді өз сөзінде министр.
Сонымен қатар, аталған жиын барысында алдағы уақытта атқарылатын іс-шаралар қатары мен жоспарлы жұмыстар жайлы да тұшымды мәліметтер берілді. Ал ведомство басшысы атап өткен су ресурстарын үнемді пайдалану мен оның инфрақұрылымдарын сандық жүйеге енгізу мәселесі шығыс аймағы бойынша күн тәртібінде қала бермек.
Өз тілшіміз
