Шығыс Қазақстан облысының төтенше жағдайлар департаменті күн райының жылынуына байланысты аймақта өрт қауіпінің күшейгенін хабарлады.
Бұл орайда мамандар тұрғындарға қауіпсіздік ережелерін қатаң сақтауды ескертеді. Олардың айтуынша, ашық алаңқайларда және саяжайларда шөп пен қоқыс өртеуге жол бермеу қажет. Қазіргі мезгілде орманда да от жағу аса қауіпті. Көлікте келе жатып терезеден сіріңке немесе темекі тұқылын тастауға болмайды. Сондай-ақ орманға жақын жерде оталып тұрған көлікке жанармай құюға тыйым салынады.
Ауылдарда пайдаланылған және қосалқы жерлердегі кепкен өсімдіктер мен арам шөп, егін қалдықтарын, құрғақ өсімдіктермен қатар, автожолдар мен темір жолдардың, жол өтпелерінің бөлу жолақтарындағы шыбықтарды, үгінділер мен субстанцияларды өртеуге болмайды. Қауіпті жағдай анықталса, учаскелік инспекторлар жедел әрекетке көшуі керек. Бұл орайда тұрғындарды өрт қаупінен сақтандыру жұмыстары да қолға алынуда.
Статистикаға сүйенсек, өрттің шамамен 80 пайызы жұмыс кезінде және демалыста отты жөнсіз пайдаланғандықтан, саяжайларда қарапайым қауіпсіздік шараларын елемегендіктен де пайда болады екен. «Үйлердің, саяжай құрылыстарының, қураған ағаштардың, орман-тоғай жанында от жағу өте қауіпті. Қазіргі кезеңде жел жылт еткен ұшқынды алапат өртке айналдыруы әбден мүмкін», — дейді бұл орайда ШҚО ТЖД.
Сонымен қатар, мамандар өрт шыққан жағдайда «101», «112» телефондарына қоңырау шалу қажеттігін еске салады. «Далада және орманды алқаптарда өрт қауіпсіздігі ережелерін сақтамағандар ҚР Әкімшілік құқық бұзушылық туралы Кодексінің 336, 410-баптары бойынша әкімшілік жауапкершілікке тартылады», — деп ескертті ШҚО ТЖД.
Десек те, қауіпсіздік шараларының жоғары деңгейіне қарамастан, ШҚО-ның кейбір аудандарында дала өрті орын алуда. Мәселен, Шығыс Қазақстанның Зайсан ауданында дала өрті тұтанды. Айнабұлақ ауылдық округі аумағында өрт шыққаны туралы ақпарат төтенше қызмет өкілдеріне 3 қыркүйекте берілген. Құтқарушылар тілсіз жаумен екі-үш күн үзіліссіз арпалысты. Өрттен қаза болған және зардап шеккен адам жоқ.
– Өрт құрғақ шөп пен бұта-қарағаннан басталған. Таулы өлкеде жалын тез өршіп, 45 гектар аумақты шарпыды. 5 қыркүйекте сағат 8:00-де өрт толықтай сөндірілді, – деп мәлімдеді облыстық төтенше жағдайлар департаментінің баспасөз қызметі.
Сол тәрізді аталған департамент мамандарының мәліметінше, шығыстағы «Зырян орман шаруашылығы» КММ мен Быков орманшылығы аумағында шөп пен бұта өртенген. Өрт сөндіру қызметкерлері мен жергілікті атқарушы органдардың жұмысы дереу ұйымдастырылып, қазір тілсіз жаумен күрес жүргізіліп жатыр.
ШҚО ТЖД баспасөз қызметінің мәліметіне сүйенсек, өрттің алдын ала аумағы — 167 гектарды құрайды. Аумақты тексеру мақсатында «Қазавиаорманқорғау» мекемесінің АН-2 ұшағы да жұмылдырылған.
Айта кету керек, қазір қызыл жалыннан ешқандай елді мекенге қауіп төніп тұрған жоқ.
Өрт сөндіру жұмыстарына ШҚО ТЖД, орман шаруашылығы және «Қазавиаорманқорғау» мекемелерінен 344 адам және 25 техника, сондай-ақ суағар құрылғысы бар ШҚО АП МИ-8 тікұшағы іске қосылды, — деп түсіндірді ШҚО ТЖД баспасөз қызметі.
Жағдай тұрақты бақылауға алынған. ШҚО ТЖД-да және өрт орнында жедел штабтар жұмыс істеп жатыр.
«СТ» — ақпарат
