Жуырда өткен Үкімет отырысында Абай облысының облыс әкімі Нұрлан Ұранхаев аймақтың алдағы жылыту маусымына дайындығы жөнінде есеп берді. Белгілі болғандай, қазіргі таңда аймақта қысқы мезгілге әзірлік жұмыстары қарқынды түрде жүргізілуде.
Нұрлан Тельманұлы өз сөзінде бүгінгі таңда облыс бойынша барлығы 312 жылу көзі жұмыс істейтінін, соның ішінде Семей қаласы бойынша – 18 нысан бар екенін, жылыту маусымына даярлық шаралары қалыпты жүргізіліп жатқанын айтты.
– Облысымыздың жылыту маусымына жалпы қажеттілігі 1,2 млн тоннаны құрайды. Бүгінде 406 мың тонна көмір жеткізілді. Қысқа дайындық әлі де жалғасуда, – деп атап өтті Абай облысының әкімі.
Жылыту маусымына әзірлік жүргізуде негізгі салмақ қатты отын тасымалына түсетіні белгілі. Бұл орайда «Қаражыра» АҚ аймақтағы барлық кәсіпорынмен тиісті шарт жасасқан екен. Соның нәтижесінде, жалпы қажеттілік, яғни, жыл бойы көмірді жөнелту көлемі анықталған. Кестеге сәйкес, шілде айында Абай облысы мен ШҚО кәсіпорындары және энергиямен жабдықтаушы компаниялары үшін 256 мың тонна, тамызда – 306,78 мың, қыркүйекте – 358,143 мың тонна жөнелту жоспарланып, іске асырылған. Одан әрі өсу қарқыны бойынша: 436,535 мың тонна – қазанда, 458,528 мың тонна – қарашада және 486,046 мың тонна көмір желтоқсанда жеткізілуі тиіс. Яғни, жыл соңына дейін «Қаражыра» көмір кенішінен тұрғын үй секторын, өңірдегі кәсіпорындар мен ұйымдарды жылыту үшін жалпы көлемі 2,532 млн тонна көмір жеткізілуі тиіс.
Бүгінгі таңда Өскемен мен Семейдің теміржол тұйықтарында көмір қоры жеткілікті. Оны тек қалалықтар ғана емес, шалғай аудандардың тұрғындары да сатып алуда. Бұл бағыттағы жұмыстар күзгі мезгілде көмір тапшылығын және қарбалас тудырмас үшін ерте қолға алыныпты. Мәселен, биыл мамыр айының өзінде Өскемен қаласына 12 мың тонна коммуналдық-тұрмыстық көмір, Семейге 6 мың тонна көмір жеткізілген.
Қазір халықтың көмірді жылдық тұтыну көлемі 1,1-1,2 млн тоннаны құрайды екен. Жыл соңына дейін жасалған тиеу жоспарына сәйкес, Семейге 174,5 мың тонна коммуналдық-тұрмыстық көмір, ал жалпы Шығыс Қазақстан станциясына – 456,2 мың тонна көмір жеткізу жоспарланған.
Көмір бағасы осы жылы кеніш бортында теміржол тарифінсіз тұрғындар үшін тоннасына 5 500 теңгені құрайды (2021 жылы – 4 946 теңге болған). Энергетикалық кәсіпорындар үшін көмірдің бағасы теміржол тарифінсіз тоннасына 3 700-3 900 теңгені құрайды. Алайда, ол халыққа жеткен кезде баға екі есе өседі.
Қазір жеке сектордың тұрғындары қатты отынды тоннасына 10 мыңнан 12 500 теңгеге дейін сатып алуға мәжбүр. Әйтсе де, бұл қатып қалған баға емес, алдағы уақытта, күздің қара суығы басталғанда бұл баға тағы да өсуі ықтимал.
Жалпы, аталған бағыттағы шаралар облыс әкімдігінің жіті назарында тұр. Мамандардың айтуынша, әзірге көмір жетекізу және саудалау ісі кедергісіз жүргізілуде, тосын жайттар туындаған жоқ.
Әлібек КЕМЕЛХАН,
«Семей таңы»
