Облыс әкімдігінде Абай облыстық мәслихатының кезектен тыс VI сессиясы өтті. Сессия отырысына облыс әкімінің бірінші орынбасары Айдын Кәрімов, облыстық мәслихат хатшысы Қуаныш Сүлейменов және мәслихат депутаттары қатысты.
Күн тәртібіндегі басты мәселе – облыс бюджетіне өзгеріс енгізу төңірегінде өрбіді. Бастапқы кезеңде 258 миллион теңгеге бюджет қаржысы бекітілді. Айта кетейік, бұл облыс бюджетінің барлық сомасы емес. Бұдан әрі бюджеттік рәсімге сәйкес, облыстық бюджетте атқарушы органдарға жүктелген міндеттерді іске асыру үшін Үкімет резервінен бөлінген 444 миллион теңге қаражат бекітіледі. Соңғы бюджет барлық трансферттер мен субвенцияларды Абай облысына беруді ескере отырып, ШҚО бюджеті нақтыланғаннан кейін толық көлемде қалыптастырылады. Соның нәтижесінде, бюджеттің жалпы көлемі 248,5 млрд теңгені құрайды. Бұл туралы жиын барысында экономика және бюджеттік жоспарлау басқармасының басшысы Роза Құдайбергенқызы хабарлады.
Сонымен қатар, сессия отырсында уақытша жер пайдалануды жоспарлау, тағы да бірқатар депутаттық сауалдар қаралды. Депутат Әсемхан Досқожанов Қарағайлы ықшам ауданындағы атаусыз көшеге аймағымыздың тарихи тұлғасы, заманында танымал меценат болған Тінібай Қаукенұлының атын беруді ұсынды.
Тiнiбай Кәукенов – ХIХ ғасырдың бiрiншi жартысында еліміз бойынша тауар-ақша қатынасы дамып, кеңінен қанат жая бастаған кезеңде тек Семей өңiрiнде ғана емес, қазақ арасында алғаш саудамен айналысып, 2-шi гильдi көпес атағын алған iрi саудагер болған жан. Сонымен қатар, Семей өңiрiнен Меккеге барып қайтқан алғашқы қажылардың бiрi.
Сессия отырысында депутаттар қаладағы Глинки көшесіне аға сұлтан Құнанбайдың есімін беруді ұсынды. Бұл қаланың зиялы қауымы тарапынан көптен бері көтеріліп жүрген мәселе еді. Өйткені Құнанбай тек ұлы Абайдың әкесі ғана емес, өз заманының көрнекті қайраткері болған тұлға. Ендеше, оның есімін көшеге беру жұртшылық тарапынан қолдау табары анық.
Талшын ҚАЛИАСҚАР,
«Семей таңы»
