Еліміздің барлық аймағы орман өртінің тигізген залалына байланысты Қостанай облысына көмек жіберуде. Абай облысының тұрғындары да зардап шеккен қостанайлықтарға бес мың тоннаға жуық метариалдық көмек көрсетті.
Гуманитарлық көмек жинау аймағымыз бойынша әлі де жалғасуда. Бұған «AMANAT» партиясы Абай облыстық филиалы, «Жастар рухы» партиясы Жастар қанатының және жастар ресурстық орталығының өкілдері, сондай-ақ, ҚМДБ-ның Семей өкілдігі және кәсіпкер азаматтар бастамашы болуда. Облыстың жанашыр тұрғындары отандастарына азық-түлік, тұрмыстық тауарлар мен киім-кешектер, дәрілік заттарды мол көлемде әкеліп жатыр.
— Бүкіл ел бойынша «Жастар рухы» жастар қанатының 1200-ге жуық белсендісі гуманитарлық көмек жинаумен белсенді айналысуда. Қала мен облыстың жанашыр тұрғындары да барынша көмек көрсетуде. Гуманитарлық көмек жинау 4 қыркүйек күні таңертең басталды және бүгінгі күні бес мың тоннаға жуық зат жиналды. Енді гуманитарлық көмек жөнелтілетін болады, — дейді бұл орайда «AMANAT» партиясының «Жастар рухы» жастар қанаты қалалық филиалының жетекшісі Темірлан Бақтияров. Гуманитарлық көмектің алғашқы партиясы Қостанай облысына сол күні кешкісін жөнелтілді.
Абай облыстық «Абай Құнанбайұлы» мешітінде де Зекет және қайырымдылық қорының ұйымдастыруымен «Абай елінен Қостанай еліне көмек» атты қайырымдылық акциясы басталды. Аталған акция 10 қыркүйекке дейін жалғасын табады. Игі бастама ҚМДБ төрағасы, Бас мүфти Наурызбай қажы Тағанұлының бастамасымен жүзеге асуда.
–Әрбір қиындықтан кейін Алланың жеңілдігі болатынын ұмытпауымыз керек. Абай атамыз «Біріңді қазақ, бірің дос, көрмесең істің бәрі бос», – деді емес пе? Ендеше, осындай кезде елдігімізді, бірлігімізді, жанашырлығымыз бен мұсылмандығымызды танытып, сол жақтағы ағайындарға көмек қолын созуды ұйғарып жатырмыз», — дейді аталған іс-шараның облысымыз бойынша ұйымдастырушысы, Абай облысының бас имамы Асқар Мұқанов.
Шығыс Қазақстан облысының тұрғындары да Қостанайдағы өрттен зардап шеккендерге аз уақыттың ішінде 35 тонна гуманитарлық көмек жинады.
Осы уақытқа дейін Өскемен қаласындағы «AMANAT» партиясы Шығыс Қазақстан облыстық филиалының гуманитарлық пунктінде 35 тоннадан астам жүк жиналды. Өңір жұртшылығы Қостанай облысына 4 қыркүйектен бастап қол ұшын созуға кіріскен.
«Барлық деңгейдегі депутаттар, жанашыр азаматтар, жастар мен еріктілер азық-түлік, тұрмыстық техника мен қажетті заттарды жинап жатыр. Бұл бағыттағы жұмыстар алдағы уақытта да жалғаса бермек. Дәл қазір гуманитарлық пунктке 14 тонна ұн, 5 тонна макарон, 10 тонна күнбағыс майы, 3 тонна ауыз су жиналды», – дейді партия филиалының жауапты хатшысы Сайрангүл Жұмаділова.
Азамат ЕРСАЙЫН,
«Семей таңы».
