Ел шығысындағы өрт қаупі әлі сейілмей тұр. Жекелеген аудандарда дала өрті тіркелуде. Бұл жайында Абай облыстық төтенше жағдайлар департаментінде өрттің алдын алу шараларына байланысты өткен баспасөз мәслихатының екінші отырысында айтылды.
Өз кіріспе сөзінде департамент басшысы Манарбек Шапағатов қазіргі уақытта Үржар ауданында 5960 гектарды құрайтын табиғи өрт орын алғандығын хабарлады. Өртпен күрес қыркүйек айының алтыншы жұлдызынан басталған. Тілсіз жаудың алдын алуды кірме жолдардың болмауы және таулы жердің күрделі рельефі қиындатқан. Жалпы, өртпен күреске 321 адам, 39 техника, сондай-ақ су төгетін құрылғысы бар тікұшақ жұмылдырылғандығын мәлімдеді.
Ағымдағы жылдың 6-шы және 9-шы қыркүйегі күндері аралығында Абай облысы бойынша жалпы ауданы 7000 гектарды құрайтын 9 табиғи өрт және жалпы ауданы шамамен 1000 гектарды құрайтын 27 құрғақ шөптің жануы тіркеліпті.
Табиғи өрттер облыстың Үржар, Абай, Жарма, Ақсуат аудандарында және Бесқарағай ауданында орын алған. Өртті сөндіруге мемлекеттік құрылымдардан 608 адам және 94 техника жұмылдырылған.
Тағы бір айта кететін жайт, ағымдағы жылғы 8-ші тамыз күні Жарма ауданында өртті жою кезінде бөлімше командирі, жүргізуші — қызметкер және өрт сөндіруші әртүрлі дәрежедегі күйік алып, Шар қалалық ауруханасына жатқызылған. Өкінішке орай, жүргізуші Айдос Тоғызбаев денесінің 95%-н күйік шалып, көз жұмды.
Сонымен қатар, департамент басшысы Манарбек Шапағатов табиғи өрттің өсуі өткен жылмен салыстырғанда 26%-ға жоғарылағанын да айтып өтті. Қазіргі таңда жедел штабтың жұмысы жалғасуда, қызметкерлер тәулік бойы өртпен күрес жүргізуде.
Кездесу соңында ол жергілікті атқарушы органдарға, халыққа, полиция қызметкерлеріне, әскери қызметшілерге дала өрттерін сөндіру кезінде көрсеткен ұстамдылығы мен батырлығы үшін алғыс білдірді.
Саяжан КЕРІМБЕКОВА,
«Семей таңы»
