КӨЛІК САЛАСЫН ЦИФРЛАНДЫРУДА ОҢ НӘТИЖЕ БАР
Шығыс Қазақстан облысы әкімдігінде өткен кеңейтілген кеңесте бірқатар маңызды мәселелер талқыланды, соның ішінде аймақтағы көлік саласын цифрландыру жайы кеңінен сөз болды.
Жиын барысында облыс әкімі Даниал Ахметов атап өткендей, қазіргі таңда Шығыс Қазақстан бойынша қолға алынған бейнетіркеу жүйесі өзінің оң нәтижелерін көрсетуде. Айталық, Өскеменде жол-көлік оқиғаларының саны 17 пайызға төмендеген. Сонымен қатар биылғы жылдың басынан бері 6 мыңнан астам әкімшілік және 88 қылмыстық іс уақтылы ашылды. Риддер (335 бейнекамера) және Алтай (224 бейнекамера) қалаларында «Сергек» жүйесін орнату үшін қосымша жобалар әзірленген. Сонымен қатар соңғы екі айдың ішінде мобильді қосымша және карталар арқылы жолаушылар көлігінде жол жүру ақысының мөлшері 72 пайызды құрады. — Осылайша, біз тасымалдаушылар қызметінің ашықтығын және осы саланы субсидиялаудың нақты деңгейін көріп отырмыз, — деді аймақ басшысы Даниал Ахметов. Күн тәртібінде қаралған тағы бір мәселе аймақтағы егін жинау науқанына қатысты болды. Жиында айтылғандай, бүгінде егіс алқаптарының 80 пайызы жиналған, қазіргі қарқын жаман емес. Фермерлерде техника жеткілікті. 18 мың тонна дизель отыны бар, бұл жинау компаниясын аяқтауға жеткілікті. Осы орайда ШҚО әкімі Даниал Кенжетайұлы құзырлы орындар басшыларына майлы дақылдарды өңдейтін зауыттардың іске қосылуы мен егіс алқаптарындағы өзгерістерді ынталандыру бойынша ұсыныстар әзірлеуді тапсырды. Жиында сондай-ақ медицина саласы бойынша кадрлар тапшылығы мәселесі де сөз болды. Аталған мәселе бұрынғысынша өзекті болып қалуда. Атап айтқанда, Өскемен, Риддер, Алтай қалаларында және Глубокое ауданында дәрігерлер жетіспейді. Осыған орай жастарды осы салаға тарту үшін медицина мамандарын баспанамен қамтамасыз етуге ерекше көңіл бөлінбек. Даниал Ахметовтің айтуынша, Өскеменде дәрігерлерге арналған көп қабатты үйдің құрылысы басталуы тиіс. — Биылғы жылы медициналық оқу орындарының 91 түлегі облыс ауруханаларына тұрақты жұмысқа орналастырылды. Бұл бағыттағы жұмыстарды алдағы уақыттарда да жалғастыратын боламыз. Мен осы жылы Өскемендегі дәрігерлерге арналған үйдің құрылысын бастауды тапсырдым. Сондай-ақ қалалар мен аудандардың әкімдері медицина қызметкерлеріне арналған үйлердің жобаларын ұсынатын болады, — деп атап өтті облыс әкімі.
