ЖОЛ ҚҰРЫЛЫСЫ ҚАЙТА ЖАНДАНАДЫ
ШҚО әкімі Даниал Ахметов жұмыс сапарымен Алтай ауданында болып, мәслихат депутаттарының келісімімен ауданның жаңа әкімі Ернар Мұстафинді таныстырды. Аудан активі алдында сөз алған Даниал Кенжетайұлы жаңа басшының еңбек жолына және алдағы уақытта аталған өңірде атқарылуы тиіс іс-шараларға тоқталды.
— Ернар Мұстафиннің тәжірибесі мол, депутаттардың қолдауымен, қойылған міндеттерді орындай алады деп сенемін. Ең алдымен, бұл — Алтай қаласының су тартқышын қайта жаңартуды аяқтау, қысқа мерзімде заманауи фитнес- -орталық салу жобасын әзірлеу және ауданда жаңа мектеп салу жобасын дайындау, — деді ШҚО әкімі. Сондай-ақ Даниал Ахметов ауданда атқарылып жатқан игі істерді де сөз етті. — Серебрянск қаласына келетін болсақ, мұнда сумен жабдықтау бойынша жоба аяқталу сатысында, қазіргі уақытта ол сараптамадан өтуде. Серебрянск органикалық емес өндіріс зауытына келетін болсақ, бүгінде барлық заңды рәсімдер жүргізілуде, бұл уақытты қажет етеді. Зауытты іске қосу алгоритмі әзірленді. Жақын арада кәсіпорын өз жұмысын бастайды. Жобаны түзеткеннен кейін біз Алтай — Өскемен жолындағы жол-құрылыс жұмыстарын қайта бастаймыз. Бұл облыс үшін маңызды бағытты аяқтаймыз, — дейді бұл ретте Даниал Кенжетайұлы. Аудан активімен кездесу барысында сондай-ақ Мемлекет басшысы Қасым-Жомарт Тоқаевтың Жолдауы талқыланды. Жиында айтылғандай, ауданда Жолдау аясында атқарылуы тиіс жұмыс көп. Алтай ауданында ауыл шаруашылығының мықты құрылымдары көп болғандықтан, жерді мемлекет меншігіне қайтару, өсімдік шаруашылы- ғы мен мал шаруашылығындағы бағдарламаларды субсидиялау мәселесі агросектордың дамуына тиімді әсер етеді. Бұл орайда Президент тапсырмасын басшылыққа алып жұмыс жүргізу қажет. Кездесу барысында денсаулық сақтау және білім беру, сондай-ақ әлеуметтік салалардағы мәселелер де талқы- ланды. Жалпы, Алтай — бүгінде қарқынды дамып келе жатқан аудан. Өткен жылдар ішінде маңызды инфрақұрылымдық және ең алдымен жылумен жабдықтау мәселелері шешілді. Алдағы уақытта Бұқтырма су қоймасы мен Жаңа Бұқтырма кентінің жағалауын абаттандыруға байланысты маңызды жобалар, сондай-ақ құрылыс және әлеуметтік салалардағы жобалар іске асырылады.
Саяжан КЕРІМБЕКОВА,
«Семей таңы»
