«БІРТҰТАС ҰЛТ – БІРТҰТАС ӘСКЕР»
Қыркүйек айының он екінші жұлдызында Абай атындағы драма театрда, Қазақстан Республикасы Қарулы Күштерінің 30 жылдығына және күзгі әскерге шақыру науқанына орай, «Біртұтас ұлт — біртұтас әскер» тақырыбымен концерт өтті. Мерекелік бағдарламаны Қарулы Күштердің ақпараттық насихат тобы құрамындағы ұлттық-әскери патриоттық орталығы ұйымдастырды.
Қазақстанның Қарулы Күштері — ҚР әскери құрылымы әскери басқару органдарын, Қарулы Күштердiң түрлерiн, арнайы әскерлердi, тыл, әскери оқу орындары мен ғылыми мекемелердi қамтитын іргелі құрылым. Отан қорғаушыларға арналған іс-шараның мақсаты – жастарды әскери борышын өткеруге ынталандыру және әскери саланың құндылығын арттыру. Салтанатты шараға Қазақстан Қарулы Күштерінің ардагерлері, «Жас ұлан» мектебінің тәрбиеленушілері, «Жас сарбаз» қозғалысының мүшелері, әскерге дейінгі жастар және қала қонақтары қатысты.
Іс-шарада Қазақстан Республикасы Қарулы Күштерінің құрылғанына 30 жыл толуына орай сала ардагерлері марапатталды. Марапат иелері өз кезегінде сөз алып, игі тілектерін білдірді.
— Біз еліміздің Қарулы Күштерінің 30 жылдығы құрметіне, қорғаныс істері жөніндегі басқарманың құрылуына орай арнайы жиналдық. Семейдегі қорғаныс істері жөніндегі басқарманың құрылғанына 100 жылдан асты. Еліміз Тәуелсіздік алғанға дейін Отан қорғаушылар күнін кеңестік датамен атап өтсек, бүгінде бұл мереке Қазақстан Республикасының Қарулы Күштерінің құрылған күніне байланысты 7 мамырда атап өтіледі. Бұл — мемлекетіміздің Отан қорғаушылардың қаһарман ерліктерін ұмытпайтындығының белгісі. Біз жастарымызды Қарулы Күштер қатарына шығарып салғалы отырмыз. Болашақ сарбаздарға айтарым — Семей қаласы жауынгерлік ерліктерге бай қала екені естеріңізде болсын. Сіздер Отан алдындағы борыштарыңызды адал атқарады деген сенімдемін. Барлықтарыңызға мықты денсаулық, ұзақ ғұмыр тілеймін! — деп ақ тілегін жеткізді жергілікті әскери басқару органдарының ардагері, отставкадағы полковник Ғарифулла Тайматов.
Тағылымды кеште жастарды отансүйгіштікке, ерлікке баулитын патриоттық сарындағы әндер шырқалып, тамылжыған күйлер орындалды. Сондай-ақ елімізге танымал бишілер тобы да өз өнерлерін көрсетіп, тың туындыларын көпшілікке паш етті.
Айта кетейік, концерттік бағдарламасы Семей қаласынан бастау алған ұлттық әскери орталық еліміздің әр өңірін аралап шықпақ.
Дана ТАЛҒАТБЕК,
«Семей таңы»
