АБАТТАНДЫРУ ЖҰМЫСТАРЫ ҚАРҚЫНДЫ
Шығыс Қазақстан облысының орталығы Өскемен қаласында абаттандыру жұмыстары қарқынды жүргізілуде. Қаланың көрікті жерлерінің бірі саналатын «Металлург» саябағындағы жөндеу жұмыстары аяқталуға жақын. Жөндеу жұмыстарының бірінші кезеңінде саябақтың солтүстік бөлігі қамтылды. Виноградов көшесінен бастап бас аллея мен аттракциондар аймағы жөнделіп, Назарбаев даңғылына қарама-қарсы орналасқан жаңа кең аллея жабдықталды. Саябақтың солтүстік бөлігінде автокөлік тұрағы мен серуендеуге арналған орын пайда болды. Шағын сәулет нысандары қойылып, орындықтар жаңартылды.
Сәулетші Борис Невзоров саябақтағы автотұраққа қарай жолдар жасап, белгілер және бағдаршамдар қоюды ұсынды. Қала әкімі Жақсылық Омардың айтуынша, қаржылық мүмкіндіктер болып жатса, осы және басқа да бірқатар идеяларды жүзеге асыруға болады. Шаһар басшысы саябақта қосымша алаңдар салу мүмкіндіктері де қарастырылатынын атап өтті.
Ал Интернационал көшесіндегі 1,6 шақырымдық асфальт жабынын ауыстыру ісі де аяқталды. Сондай-ақ Буров және Новаторлар көшелерінде де орташа жөндеу жұмыстары жүргізіліп, асфальт толықтай жаңартылды. Алдағы уақытта осы аумақтағы жылу желілерін және жаяу жүргіншілер жолын қалпына келтіру жұмыстары жүргізілетін болады.
Сол сияқты «Халық қатысатын бюджет» жобасы аясында аулаларды жөндеу жұмыстары өз жалғасын табуда. Әр ауладағы жөндеу жұмыстарынан соң спорт алаңы, балалар ойнайтын алаң, серуендеуге арналған жолдар жасалады.
Облыс орталығында сонымен қатар жаңа трамвай аялдамалары орнатылуда. Ашық металдан жасалған көгілдір түсті аялдама павильондары Орталық базардың жанында және Чехов көшесінде қойылды. Мұндай павильондар алдағы уақытта мүмкіндігіне қарай барлық трамвай аялдамаларында орнатылмақ.
Кейін павильондардың ішінде трамвайлар туралы ақпараттарды орналастыру жоспарланып отыр.
Айта кетерлігі, қаланы абаттандыруға, оның тазалығын сақтауға тұрғындар да өз үлестерін қосуда. Мысалы, өткен аптада Виноградов пен 30-шы Гвардиялық Дивизия көшелерінің қиылысында орналасқан саябақ ретке келтірілді. Оған жақын маңдағы үйдің тұрғындары мен «Таза Өскемен» мекемесінің қызметкерлері атсалысты. Бұрын медициналық колледждің қарамағында болған бұл алаң соңғы уақытта қараусыз қалған. «Таза Өскемен» мекемесі басшыларының айтуынша, жақында саябақ коммуналдық меншікке өтіпті, алайда абаттандырылатын аумақтар тізбесіне әлі енгізілмеген екен. Саябаққа жақын маңдағы үйлердің тұрғындары әлеуметтік желі арқылы тазалық жұмыстарын жүргізу туралы ұсыныс білдірген соң, «Таза Өскемен» мекемесі дереу іске кіріскен. Өйткені өрт қауіпсіздігі тұрғысынан аталған аумақ ретке келтіруді қажет етіп тұрған болатын. Сондықтан сенбілік ұйымдастырылып, тұрғындардың көмегімен алаңдағы қураған ағаштар кесіліп, қоқыстан тазартылды.
Зарина КӘП,
«Семей таңы»
