БИЗНЕСТІ ОНЛАЙН РЕЖИМІНДЕ ТІРКЕУДЕ
Шығыс Қазақстан облысында ағымдағы жылдың басынан бері жалпы саны екі мыңнан аса адам өз бизнестерін онлайн түрде тіркеуден өткізіпті. Аталған жаңашылдық ел шығысында да танымалдылыққа ие бола бастады. Бұл жайында жуырда «Азаматтарға арналған үкімет» мемлекеттік корпорациясы Шығыс Қазақстан облыстық филиалы директорының орынбасары Меруерт Тарыбаева мәлімдеді.
Ол сонымен қатар заңды тұлғаларды мемлекеттік тіркеуді онлайн режимінде жүргізужолдарын да түсіндіріп, кеңінен айтып берді.
Жалпы, қазіргі таңда бұл қызмет түрі Қазақстандағы ең көп талап етілетін мемлекеттік қызметтердің біріне жатады екен.
— Тіркеуді шығынсыз әрі жедел жасау үшін заңды тұлғаға ХҚО-ға жүгінудің мүлде қажеті жоқ. Әсіресе шағын және орта бизнес субъектілерін тіркеуге, коммерциялық заңды тұлғаларды қайта тіркеуге немесе таратуға қатысты қызметтердің барлығын eGov порталы арқылы жасауға болады. Электронды өтінішті толтыру жеткілікті. Бір күн ішінде тіркеушінің жеке кабинетіне мемлекеттік тіркеу туралы электронды анықтама немесе бас тарту түрінде жауап жіберіледі. Қажет болған жағдайда, бизнесті тіркеу туралы куәлікті басып шығаруға болады, — деді ол.
Бизнесті тіркеу процедурасын жеделдету мемлекеттік қызметтерді автоматтандыру және оңтайландыру үдерісінің арқасында мүмкін болып отыр. Бұрын өтініш беруші мемлекеттік органға бес және одан да көп құжатпен келіп, тіркеуді алу үшін деректерді тексеруді бес күнге дейін күтетін болса, бүгінде электронды түрдегі барлық рәсім жүргізу бір күннен аспайды және ешқандай құжат талап етілмейді.
— Сонымен қатар заңды тұлғаның басшысын ауыстыру — ең кең таралған қызмет түрінің бірі. Қазіргі уақытта eGov.kz электронды үкімет порталы арқылы заңды тұлғаның басшысын ауыстыру қызметі іске қосылды. Жалпы, жыл басынан бері облыс бойынша 2000-ға жуық адам бизнесті онлайн тіркеді, — деді Меруерт Тарыбаева.
«СТ» — ақпарат
