РОБОТОТЕХНИКА ОРТАЛЫҒЫ ӨЗ ЕСІГІН АЙҚАРА АШТЫ
Қалалық балалар мен жастардың шығармашылық сарайында жаңа заманауи жабдықталған робототехника орталығы ашылды. Орталықтың салтанатты ашылуына Абай облысының әкімі Нұрлан Ұранхаев, «Сәби» Республикалық қайырымдылық қорының негізін қалаушылар Әсел Тасмағамбетова мен Кеңес Рақышев қатысты.
Орталық 15 оқу орнына есептелген. Мұнда білім алушылар ақпаратпен сандық форматта жұмыс істей алады. Жаңа кабинет «Activepanel AP 75» сенсорлық моноблогымен, презентацияларды көрсету үшін «TETRIX PRIME» радиобасқарылатын үлгілерді жасауға арналған робототехникалық жиынтық, модельдерді құюға арналған «CREATOR Pro» 3Д принтерімен, роботтардың футбол ойнауына арналған футбол алаңдары мен инфроқызыл доптармен жабдықталған. Сондай-ақ мини сумо, кегельринг, қара сызықпен жүру сияқты бағыттар бойынша жаттығулар мен жарыстар өткізуге арналған алаңдар бар.
Балалар мен жастардың шығармашылық сарайының директоры Қанат Шапатов заманға сай құрылғылармен жабдықталған орталық жұмысымен таныстырып, ерекшелігіне тоқталды.
— Балалар мен жастардың шығармашылық сарайы – қаламыздағы ең ірі және көп салалы қосымша білім беретін мекеме. Біздің мекемеге 4400 бала қатысады, осы ғимаратта 2500 бала. Көркемдік-эстетикалық, музыкалық, бейнелеу, би өнері, қолөнер, әскери сияқты 10 бағытта жұмыс жасаймыз. Дамытып жатқан бағытымыздың бірі – IT технология. Бастауыш балаларға арналған LEGO құрастырмаларына жеке кабинет болғанымен ол жеткіліксіз. Мына орталыққа күрделі жөндеу жұмыстарын жүргізіп, заманауи құрылғыларды орнатқан – «Сәби» қоры. Қор президенті Әсел Тасмағамбетованың демеушілігімен робототехника орталығы ашылды. Орталықта 2 мұғалім жұмыс істейді. Бұл пән мектепте болса да, бұл жерде оқушылар өз қабілеттерін бекіте алады, — дейді Қанат Мұратұлы.
Жиында сөз алған өңір басшысы балаларды жаңа технологияларға тартудың маңыздылығын атап өтті.
— Меценаттардың осындай қолдауларының арқасында көптеген балалар ғылыми-техникалық, инновациялық салада білім алуға мүмкіндік алды. Семейде жаңа цифрлық орталықтың ашылуы біздің облысымыздың балалары үшін маңызды. Өйткені робототехника – болашақтағы мүмкіндігі ең жоғары бағыттарының бірі. Біз балаларға жаңа білім алуға және өз әлеуетін іске асыруға көмектесетін барлық жобалар бойынша бірлесе жұмыс істеуге дайынбыз, — деп атап өтті Нұрлан Ұранхаев.
Еліміздің барлық өңірінде бұндай орталықтардың кеңінен таралуын мақсат ететін қор бастамасымен Алматы, Петропавл қалаларынан кейінгі еліміздегі үшінші орталық қаламызда ашылып отыр. «Сәби» қорының президенті Әсел Тасмағамбетова өз кезегінде орталықтарды республикалық деңгейде масштабтау туралы шешімнің кездейсоқ пайда болмағанын түсіндірді.
— Құрметті Семей қаласының тұрғындары, роботехника орталығының ашылуында көріскеніме қуаныштымын! «Сәби» қоры 20 жылдан астам Қазақстанның өңірлік қалаларында қайырымдылық жобаларын жүзеге асырып келеді және біз елімізде дарынды балалар мен талантты педагогтардың көп екеніне көзімізді жеткіздік. «Сәби» қоры Абай өңірінде де бірнеше жобаларын іске қосты, мәселен, 2011 жылы «Инватакси» қызметін, кейіннен 4 ойын және спорттық алаңдары ашылды, көптеген дарынды балаларға арнайы қолдау көрсетілді. 2 жыл бұрын ең үлкен жобалардың бірі – балалар хирургиясының жұмысын бастауы. Бастамалардың жалғасы ретінде Семей қаласында роботехника орталығының ашылды. Осындай қарқынды заманда орталық балалардың жан-жақты дамуына, ой-өрісін дамытып, потенциалын көтеруге ықпал етеді деп ойлаймын. Market Research Future зерттеуіне сәйкес робототехниканың жаһандық нарығы жыл сайын 22,8 пайызға өседі және 2030 жылға қарай $214,68 млрд долларға жетеді деп күтілуде. Бұл бізге робототехника орталықтары сұранысқа ие болатынына және жоба жақсы нәтиже береді деп болжауға негіз береді, — деді Әсел Иманғалиқызы.
Қаламызда ашылған орталықтың жалпы ауданы – 75 шаршы метр. Жобаның құны 26,3 миллион теңгені құрады. Орталықта 150-ден астам бала роботехника әуесқойларының қатарын толықтырады. Аталған орталыққа барлық қалаған оқушылар тегін бара алады.
