Алматыда «Бала дауысы» ұлттық балалар ән байқауының VII маусымы өткен еді. Байқауға біздің облыс намысын қорғауға қатысқан жас әнші Ырысгүл Қайратбек ГРАН-ПРИ иегері атанды. Осылайша, ол 2016 жылдан бастап өткізіліп келе жатқан еліміздегі ең ауқымды ән байқауында өнер көрсетіп, семейліктердің үкілі үмітін зор абыроймен ақтап шықты.
Қазақстанның түкпір-түкпірінен 8-12 жас аралығындағы 3 мыңнан аса жас орындаушы қатысқан байқаудың іріктеу кезеңі 5 сәуір мен 15 мамыр аралығында қашықтықтан өтті. «Бала дауысы» байқауы әлеуметтік жоба болып табылатынын айта кету керек, яғни балалар оған ақысыз негізде қатысады.
Іріктеу кезеңінің қорытындысы бойынша, кәсіби қазылар алқасы 18 финалистті анықтады, олар үшін 1 маусым мен 20 қыркүйек аралығында вокал және актерлік шеберлік бойынша сабақтар, фотосессия, телевизиялық роликтер түсіру ұйымдастырылды. Алматы қаласының тұрғындары мен қонақтары үшін VII маусымның финалистері Көк Төбе саябағында концерттік бағдарлама ұсынды.
«Бала дауысы» түлектерінің шығармашылық кеші және конкурстық концерттік бағдарламада финалистер Илья Башкатовтың жетекшілігімен және музыканттардың сүйемелдеуімен танымал халықтық және эстрадалық композицияларды орындады.
— Мен жыл сайын «Бала дауысы» қорытынды концертін асыға күтемін. Балалар қазақстандық ән әлеміне керемет саяхат сыйлады! Көрермендер өткен жылдардағы «Бала дауысы» түлектерінің өнерін тамашалады, олар қазіргі таңда біздің эстрадамыздың танымал жас орындаушылары. Ең бастысы, балалар шеберліктерін жоғары деңгейде көрсетті. Ең алдымен, бэнд музыканттарының кәсібилігін, режиссураның жоғары деңгейін, вокал бойынша педагогтардың, киім дизайнерлерінің, стилистердің, бейне-контент әзірлеушілердің жұмысын атап өткім келеді. Барлығы соншалықты үйлесімді, құрылымдық және тұтас! — деп композитор және өнертанушы Назым Мухадиева өз ойымен бөлісті.
Балалардың өнерін дәстүрлі түрде қазылар алқасы бағалады, олардың арасында қазақ эстрадасының танымал әртістері Әли Оқапов, Зарина Алтынбаева, Айри және Аян Бірбаев бар.
Кештің шарықтау шегі марапаттау рәсімі болды. Байқаудың үшінші жүлдесін Батыс Қазақстаннан келген Максим Скоробогатов, Түркістан облысынан Халық Ғалымат және Қарағанды облысының өкілі Ислам Кушенов иеленді. Екінші орынға Алматы облысынан келген Алсу Ұлуханова және Атырау облысынан Дильназ Ежірова ие болды. Алматы қаласының атынан өнер көрсеткен жас финалист София Балғазина бірінші орынды қанжығасына байлады.
Ал «Бала дауысының» VII маусымының Гран-при жүлдесін иеленген Ырысгүл Қазақ ұлттық өнер университетінің дарынды балаларға арналған мамандандырылған мектебінің грантына ие болып, Гонконгте орналасқан ертегі Диснейлендке ұмытылмас саяхатқа жолдама алды.
Жас әнші – халықаралық түрлі өнер байқауларында топ жарып, маңдайлары жарқырап жүрген қазақ елінің өнерпаз оқушыларының бірі. Оған Ырысгүлдің бұған дейін бауырлас түрік еліндегі Стамбұл маңында ІІ Түркия-Айбалық Халықаралық би және музыка фестиваліне алаш жұртының қырық шақты өнерлі балалар арасынан оза шауып, І орын иеленгені дәлел. Жас өнерпазға сонымен бірге Гүржістанның Батуми қаласындағы «ArtBatumi» жолдамасы бұйырды.
