Әлеуметтік инфрақұрылымды дамыту адам қызметінің нәтижелеріне тікелей әсер ететіні белгілі. Осы ретте халықтың өмірлік белсенділігін қамтамасыз ету, күнделікті қажеттіліктерін қанағаттандыру мақсатында Өскемен қаласында жыл сайын әлеуметтік нысандар ашылуда.
Өткен аптада қала басшысы Жақсылық Омар облыс орталығында пайдалануға берілген осындай бірқатар нысандарды аралады. Солардың бірі — мүмкіндігі шектеулі жандарға қолдау көрсету мақсатында ашылған «Жанұя» орталығы.
Көп балалы аналардың бастамашыл тобы құрған бұл орталықта сөйлеу қабілеті бұзылған балаларға және ересектерге қызмет көрсетіледі. Бұл жерде аз қамтылған және көп балалы отбасылар көмекке жүгіне алады. Қазіргі таңда орталықта 85 адам тегін қызмет алуда. Олардың көбі балалар.
Қала әкімі Жібек маталар комбинаты ауданында бой көтерген 150 орындық «Ақбота» балабақшасында да болды. Аталған шағын ауданда халық саны мен балалар саны тұрақты өсіп келеді. Сондықтан мұнда жаңа әлеуметтік нысандар салу жоспарланған.
«Аблакетка кентінде бүгінде екі балабақша жұмыс істеп тұрса да, орын жетіспеушілігі әлі де өзекті. Аудан тұрғындарымен кездесуден кейін мәселенің ақ-қарасы анықталып, шешімі де табылды. Челюскин, 1 мекенжайында орналасқан ғимаратта АБО-ның жергілікті филиалы бар. Ол «Асқар таудағы» жаңа әлеуметтік орталыққа ауыстырылды. Ал ғимаратты 140 орындық балабақшаға бейімдеп жабдықтау үшін инвесторға берілді. Жаңа әлеуметтік нысан балаларды биылдан бастап қабылдайды»,- деп жазды Жақсылық Омар әлеуметтік желідегі жеке парақшасында.
Шаһар басшысының айтуынша, 2022 жылы қалада 6 жаңа балабақша ашу жоспарланған. Олардың екеуі жұмысын бастап кеткен.
Зарина КӘП,
«Семей таңы»
