Шығыс Қазақстан облысының Күршім ауданына жаңа әкім тағайындалды. Өңірдің жаңа басшысы Алмат Талғатұлы Ақышевты аудан активіне ШҚО әкімі Даниал Ахметов таныстырды.
— Алмат Ақышев — Күршім ауданының тумасы, басқарушылық тәжірибесі жоғары маман. Біраз уақыт экономика және туризм саласында қызмет атқарды, облыстық ТҮКШ және энергетика басқармасын басқарды. Алмат Талғатұлын шешілуі тиіс бірқатар экономикалық және әлеуметтік міндеттер күтіп тұр. Ойдағыдай алып шығады деген сенімдемін,- деді облыс әкімі.
ШҚО басшысы сапар аясында аудан орталығындағы әлеуметтік нысандардың жұмысын бақылап, Бұқтырма су қоймасы арқылы өтетін көпірдің құрылыс барысын пысықтап қайтты. Күршім ауылындағы бұрын әскери комиссариат орналасқан мұражай ғимараттарының біріне барған Даниал Кенжетайұлы нысанның сәулеттік келбетін сақтап қалу үшін қайта құруға қаржы бөлінетінін жеткізді.
ШҚО әкімі Күршім аудандық ауруханасына да аялдады. Мұндағы күрделі жөндеуден өткен хирургиялық бөлімде шетелдік клиникаларда оқыған дәрігерлер жұмыс істейді. Перзентхана бөлімшесінде де жөндеу жұмыстары жүріп жатыр. Бұл ана мен балаға жоғары медициналық көмек көрсетуге мүмкіндік бермек.
— Мен облыстық денсаулық сақтау басқармасының басшылығына Марқакөлде дәрігерлерді тұрғын үймен қамтамасыз ету мәселесін қысқа мерзімде шешуді тапсырдым. Ауылдағы перзентхана бөлімшесі заманауи жабдықтармен жабдықталған. Босандыру жүйесінде екі маман жетіспейді. Олар үшін біз қысқа мерзімде баспана тұрғызамыз,- деді Д.Ахметов.
Аймақ басшысы сондай-ақ әлеуметтік нысандарды жылумен қамтамасыз ететін қазандыққа барды. Нысан жылу беру маусымына дайын.
Осыдан соң Бұқтырма су қоймасы арқылы өтетін көпір құрылысының басында болған облыс басшысы мұндағы жұмыс қарқынымен танысып, мамандармен тілдесті.
— Бұл — үш ауданды байланыстыратын бірегей стратегиялық және әлеуметтік нысан. Көпір Мемлекет басшысы Қасым-Жомарт Кемелұлы Тоқаевтың тапсырмасы бойынша салынуда. Құрылыс екі жағалаудан бірдей басталады және маусымдық ауа райына тәуелді болмас үшін, техникалық көпір іске қосылды, — деді аймақ басшысы.
Даниал Кенжетайұлының айтуынша, мұнда құрылысшылар екі ауысымда жұмыс істейді және олар үшін вахталық кент те жабдықталыпты. Өткелдің берік болуы үшін ең заманауи технологиялар қолданылуда. Көпірдің ұзындығы 1316 метр болса, төсемнің ені 10 метрге жетеді. Қазіргі уақытта 21 тіректің 9-ы салынып біткен. Ал тіректің тереңдігі 40 метрден асады. Сондай-ақ көлік айрықтары, су бұру және мал өткізу жолдары қарастырылған. Көпір кеме қатынасына кедергі келтірмейтінін атап өту қажет.
— Қазақстан үшін бірегей құрылыстың салынуы Күршім, Тарбағатай және Зайсан аудандарының логистикасын түбегейлі өзгертуге мүмкіндік береді. Жоба аяқталғаннан кейін паром өткелінің бағасы тауарлардың құнына енгізілмейді. Көпір аудандардың экономикалық және әлеуметтік дамуына, сондай-ақ туризм, өнеркәсіп және кәсіпкерлікке жаңа серпін бермек,- деді Даниал Ахметов.
Жадыра ТӨЛЕГЕНҚЫЗЫ,
«Семей таңы»
