Ұлт Көшбасшысы – Қазақстан Республикасының Президенті Н.Ә.Назарбаевтың жүлдесі үшін қазақ күресінен «Қазақстан Барысы» республикалық турнирінің биылғы жеңімпазы, Шығыстың шымыр ұлы Мұхит Тұрсынов сейсенбі күні Өскеменде ШҚО әкімі Бердібек Сапарбаевтың қабылдауында болып, сол күні кешкісін Семейге оралып, жерлестерінің ыстық ықыласына бөленді.
Өскемендегі жүздесуде аймақ басшысы Бердібек Сапарбаев ел мерейін үстем етіп, Шығыстың абыройын асқақтатқан Мұхит Тұрсыновқа автокөлік пен Семей қаласынан 3 бөлмелі пәтердің кілтін табыс етіпті. Елорда төрінен туған жердің төсіне барыс болып оралған ұлын Семей жұрты қала сыртында қошеметпен қарсы алды. Бозкілемнің төрінде тер төккен Мұхит құлын күнінен құнаннан, құнан күнінде құланнан оза шап-қан балуан. Батыр ұлдың бұл биігі бізге мақтаныш, әлбетте. Мұхит қарапайым ғана болмысы, үлкенге құрметі бар жөн білетін жөні бөлек жігіт қой. Қалың қауымның қошеметіне құлақ түріп, тілегін тыңдап, батасын алып осы жерден қала басшысы Айбек Кәрімовке арнайы келіп, інілік ізетін көрсетті.
— Біздің киелі Семей жерінен үнемі балуандар шығады. Мысалы, қазақтың тұңғыш олимпиада чемпионы Жақсылық Үшкемпіров, неше мәрте қазақтың туын көкте желбіреткен даңқты балуан Дәулет Тұрлыхановтардың есімін мақтанышпен атауға болады. Бүгінде олардың соңынан Шалқар Жоламанов, Айбек Нұғымаров, Мұхит Тұрсынов сияқты ізбасарлары келе жатыр. Аға жолын іні жалғап, биыл да біздің бағымыз жанды. Бұл бапкердің біліктілігі мен балуанның шүмектеп төккен терінің өтеуі. Семей қаласында біз осындай балуандардың барлығының басында баспанасы болсын деген ниетіміз бар. Шығыстың абыройын асқақтатқан Мұхит бауырымызға Семейден 3 бөлмелі пәтердің кілтін Бердібек Мәшбекұлы өзі салтанатты түрде табыс еткен болатын. Қуаныштарыңыз, жеңістеріңіз құтты болсын! – деді Айбек Мүталапханұлы.
{jcomments on}Бозкілемде атой салып, алып та, шалып та жығатын, оңы мен солын таңдамайтын, белдесулерінде талай апайтөс, атан жіліктің мысын басқан балуанмен тілдесудің сәті түсті.
— Үздік үштікке кіруге мақсат қойған болатынмын. Сәтін салып жеңіске жеттім. Қала жұрты құрметпен қарсы алды. Барлығына шексіз алғысымды айтқым келеді. Бердібек Мәшбекұлы мен Айбек Мүталапханұлына үлкен алғысымды айтамын, — деген балуан ұл, — Жеңісімді жерлестеріме, бүкіл Қазақстан халқына, соның ішінде Шығыс еліне арнаймын, — дейді.
Сонымен қатар, сұхбат барысында М.Тұрсынов:
— «Үмітсіз — шайтан» деген. Жеңістен әрқайсымыз үміт күттік. Асыл Бәрменовпен мен бұған дейін 4 рет белдесіп, оның екеуінде ұтылып, 2 рет ұтқан болатынмын. Міне, бесінші белдесу менің еншімде. Асыл екеуміз жасөспірім кезден бастап бір-бірімізді жақсы танимыз, әрі құрдас, әрі жолдаспыз. Жалпы, барлық белдесулер де қиын болды. Әр белдесуге үлкен үмітпен шықтым. Былтыр Бейбіт Ысты-баевқа жол беріп алған болатынмын. Бірақ, ол кезде 10 секунд қалғанда ғана маған төрешілер ескерту берді. Сол кезде ішімде аздаған “әттеген-ай” болып еді. Қайткен күнде де Бейбітті жеңетінімді дәлелдей алдым. Ал, Русланмен тактикалық әдісте күрестім деп айтуға болады.
Ал, Мұхиттың әкесі әрі бапкері Шыңғыс Тұрсынов тілшілерге берген сұхбатында:
— Серік Қоржыкенов, Қайрат Жармұхамбетов, Зекен Шаймерденов, Ербол Мырзабосынов сынды жаттықтырушылар қаңтар айынан бастап дайындықты кәсіби тұрғыда бастап, жоспар бойынша жұмыс жасадық. Төрт бөлімнен тұратын оқу-жаттығу жиынын өткіздік. Соның барлығының біздің балуандарға әсері болды деп ойлаймыз. Үш балуаннан да зор үміт күттік. Үшеуі де «Қазақстан Барысы» атануға лайықты еді. Әрине, спорт болған соң біреу жеңіледі, біреу жеңеді. Шалқар бауырымыз жарақат алып шығып қалды. Батыр аңғал келеді ғой. Айбек қапыда қалды. Сондықтан, Мұхит қана қалғандықтан, мен оған: «айналайын, балам, артыңда шығыс елі сенім артып тұр» деп намысын жаныдым. Өйткені, оның қарсыластарының бәрі мықты балуандар болды. Мұхит тыңғылықты дайындықтың, жаттықтырушылардың жыл бойғы еңбегінің арқасында жеңіске жетті деп ойлаймыз, — дейді.
Шыңғыс Тұрсыновқа «Сіз өзіңіз 40 жасқа дейін күресіп, талай мәрте түйе балуан атандыңыз. Ал, ұлыңыз «Қазақстан Барысы» атанды. Қазақстан барысымен күресуге қалай қарайсыз?» деген әзіл-қалжыңы аралас сауал тастадық.
— Әке балаға сыншы ғой. Мен жетпеген жетістікке бүгін балам жетіп жатыр, шәкірттерім жетіп жатыр. Мен өте қуаныштымын. Бұл жайдан-жай келген жеңіс емес, 26 жасқа дейін Мұхит қанша жарыстарға қатысып, қаншама биіктерді бағындырды. Әлем кубогінің иегері, әлем чемпионы, Қазақстан чемпионы, Азия чемпионы атанды. Дұрыс бағыт-бағдардың, қазақ күресін жақсы меңгергендігінің арқасында, 15 жыл бойғы төккен тердің нәтижесінде осындай жеңіске қол жеткізді деп ойлаймын. Оған анда-санда «сенімен күрессем, алып соғамын» деп қалжыңдап қоямын. Бірақ, оның менімен бәрібір күреспейтіні белгілі. Дегенмен, ол жас әрі қызу дайындықта жүрген бала. Ал, менің бұрынғыдай күш-қуатым жоқ. Сондықтан, бәрібір оған қазір шамам келеді деп айта алмаймын, — дейді (күліп) Шыңғыс Тұрсынов.
Нұрдәулет КӘКІШЕВ, «Семей таңы»
