Әр салада атқарылып жат-қан шаруалар жайлы ақпарат таратып, халықты жан-жақты хабардар етіп отыратын мамандық иелері — журналистер. Өзіндік қиындықтары мен қызығы жеткілікті осынау кәсіп иелеріне құрмет көрсетіп отыру өңірімізде қалыптасқан игі дәстүрлердің бірі. Шілденің екісі күні облыс басшысы Бердібек Сапарбаев Өскемендегі «Аралдар резиденциясы» мәдени- демалыс орталығында аймақтың БАҚ өкілдерінің облыстық форумын өткізіп, мерекелерімен құттықтап, қосқан үлестеріне лайықты марапаттарын табыстады.
Байланыс және ақпарат қызметкерлерінің күніне орай ұйымдастырылған кеште Бердібек Мәшбекұлы Мемлекет басшысының өңірімізге жасаған жұмыс сапары барысында бірқатар тапсырмалар жүктегенін айта келе, алдағы уақытта да жоспарланған маңызды шаруаларды жүзеге асыруда атқарушы биліктің бұқаралық ақпарат құралдарының көмегіне сүйенетінін жеткізді. Журналист мамандардың әр түрлі саладағы өзекті мәселелерді көтере жүріп, еліміздің дамуына, халықтың әл-ауқатының артуына, кемшіліктердің жойылып, олқылықтардың түзелуіне оң әсерлерін тигізіп келе жатқанын ерекше атап өтті.
{jcomments on}– Халық пен биліктің арасындағы алтын көпірге айналған бұқаралық ақпарат құралдарының қоғамдағы рөлі ерекше. Халық өзінің мұң-мұқтажын сіздерге айтып, шешілмей жатқан мәселелерін сіздер арқылы шешеді. Еліміздің, облысымыздың экономикасын дамытуда, қоғамның өркендеуінде БАҚ өкілдерінің қосқан үлесі зор. Өйткені, журналистер көтерген сан-салалы мәселелер халқымыздың әл-ауқатын арттыруға, кемшіліктерді жоюға ықпал етеді. Мемлекет басшысы сіздердің еңбектеріңізді жоғары бағалайды, құрметтейді. Біз де Елбасының тапсырмасын орындау мақсатында биыл он екінші рет БАҚ қызметкерлеріне облыс әкімінің жүлдесін табыс етіп отырмыз. Егемендік алған кезден бастап елімізде ақпарат құралдарына еркіндік, сөз бостандығы берілді. Сіздердің жұмыстарыңызға ешқандай шектеу қойылған жоқ. Соның бір дәлелі болар, бүгінгі күні өңірімізде 132 бұқаралық ақпарат құралы, 59 республикалық БАҚ-тың меншікті тілшісі жемісті еңбек етуде. Жалпы, біздер тізе қосып жұмыс істейтін болсақ, халықтың жағдайы жаман болмайды. Бүгінгі төл мерекелеріңіз құтты болсын, сіздерге зор денсаулық, шығармашылық табыс, шаңырақтарыңызға құт-береке тілейміз,-деді құттықтау сөзінде өңір басшысы.
Мереке иелеріне ақ тілегін арнағаннан кейін Бердібек Сапарбаев аймағымыздың тыныс-тіршілігі жайлы ақпарат таратуда белсенділік танытқан бірқатар мамандар мен БАҚ ұжымдарын облыс әкімінің сыйлығымен марапаттады. Олардың арасында өңір журналис—тикасын дамытуға, жүзеге асырылып жатқан әлеуметтік—экономикалық реформалар жайлы аймақ жұртшылығын хабардар етіп, ішкі саяси тұрақтылық пен қоғамдық келісімді нығайтуға үлес қосып жүрген «Семей таңы» және «Вести Семей» газеттерінің редакциясы бар. Бердібек Мәшбекұлы форумға қатысқан аталмыш қос басылымның Бас редакторы Риза Молдашеваға арнайы грамота мен бағалы сыйлықты табыстады.
Марапаттау рәсімінен кейін салтанатты кеш әсем ән әуелеген әдемі концертке ұласты.
Мирас ҚҰСАЙЫН,
«Семей таңы»
