Облыс орталығы Семей шаһарында ардагерлер кеңесінің конференциясы өтіп, кеңес құрамы мен төрағасы сайланды. Жиынға Абай облысының әкімі Нұрлан Ұранхаев, Қазақстан Республикасы ардагерлер ұйымының басшылығы, облыстың 2 қаласы мен 8 ауданынан делегаттар, мемлекеттік қызмет, ғылым-білім, мәдениет пен спорт, әлеуметтік және кәсіпкерлік салада абыройлы қызмет атқарған ардагерлер қатысты.
Мәжілісте облыс әкімі Нұрлан Тельманұлы сөз алып, жиынға қатысушыларды Халықаралық қарттар күнімен құттықтады. — Біздің қоғамда ақсақалдар әр кез елдік пен өнегелі өмірдің қайнар көзі болып қала береді. Осы орайда ұрпақ тәрбиесі, ел болашағы жолында Абай елінің ақсақалдарына артылған жауапкершілік жүгі ерекше, — деді аймақ басшысы.
Конференция қорытындысы бойынша күн тәртібінде 43 адамнан тұратын облыстың ардагерлер кеңесі құрылып, оның төрағалығына, Қазақстан Республикасы мәдениет саласының үздігі, Абай ауданының Құрметті азаматы, Семей қалалық ардагерлер кеңесінің төрағасы болып қызмет атқарған Алин Мұратқазы Сейсенұлы сайланды.
Абай облысы әкімдігінің баспасөз қызметі
