Құрметті Абай облысының тұрғындары!
Семей — Алаштың жүрегі, рухани астанасы. Барша қазақ ұлты мақтан ететін Ұлылар мекені. Биылғы жылы тарихи әділдік орнап, Мемлекет басшысы Қасым-Жомарт Тоқаевтың жарлығымен Семей қаласына облыс орталығы статусы қайта беріліп, Абай облысы болып жаңғырды.
Таяуда Абай облысының орталығы Семей қаласына Қазақстан Республикасының Президенті Қасым-Жомарт Кемелұлы Тоқаев жұмыс сапарымен келіп, Үкіметке Абай облысын дамытудың кешенді жоспарын әзірлеуді тапсырды. Абай облысын дамыту бойынша кешенді бағдарламалар әзірленеді. Осылайша баршамыздың сүйікті өлкеміз, кіндік қанымыз тамған киелі туған жеріміз, Ұлылар мекені дамудың жаңа кезеңіне қарыштап қадам баспақ.
Осы орайда, Біз – қойнауы қазыналы Қалба тауын мекен еткен киелі Көкпекті өңірінің халқы барша Абай облысының жұртшылығына Үндеу жариялаймыз. Алаштың жүрегі, қазақтың рухани астанасы Семей қаласын дамыту – баршамыздың ортақ парызымыз. Сүйікті қаламызды дамытып, өркендету әрбір азаматтың үлес қосуымен ғана жүзеге асатыны сөзсіз. Осы аталған мүдделерді ескере келе, Семей қаласын дамытуға үлес қосуды нақты істермен, жарқын жобалармен бастауға шақырамыз.
Топырағын түртсең тарихы сөйлеп қоя беретін Толағай тауының баурайын мекендегін Көкпекті ауданының халқы Семей қаласының ұлтымыз үшін орны ерекше тарихи-рухани шахар екенін жақсы біледі. Көкпекті өңірі – батыр бабалар тұлпары тұяғының ізі қалған киелі өлке. Толағайдың түбінде Абылай хан жорық ордасын тігіп, Қаракерей Қабанбай батыр қол бастаған жер. Әулие Бөдес ата руханият ұясын қалаған, Ұлт қайраткері Тана мырза елге тұтқа болып, Кегенбай би сөз бастаған жер. Осындай киелі өлкенің тұрғындары ұлы Абайдың атымен аталған облыстың орталығы Семей қаласын дамытуға сүбелі үлес қосуды қасиетті парыз деп санайды.
Облыс орталығына көрік беретін, Алаш қаласының ажарын ашатын бір нысан салу жобасын Көкпекті ауданы жүзеге асырады. Көкпекті ауданының осы бастамасы басқа аудандар, облыс орталығындағы мекеме мен ұйымдар тарапынан кең қолдау табады деген сенімдеміз. Жұмыла көтерген жүк жеңіл, ағайын!
Семей қаласын дамытуға Мемлекет тарапынан кешенді жобалар қолға алынды. Алайда әрбір туған жердің патриоты үлес қосқанда ғана Алаштың астанасын Тәуелсіз қазақ елінің көркейген қалалары қатарына қоса аламыз. Біздің әрқайсымыз туған өлкемізді Ұлылар мекені деп мақтан етеміз. Туған жерге іңкәрлік Туған елге сүйіспеншілікпен ұласады. Туған жерге қамқорлық Туған елге жанашырлықпен астасады. Біздің асыл мақсатымыз оның өсіп-өркендеуіне қызмет жасау. Барлық елжанды азаматтарды, жомарт жүрек жандарды, аудандар мен шағын қалаларды, облыс орталығындағы мекеме мен ұйымдарды, оқу орындарын Көкпекті ауданының бастамасына қолдау білдіруге шақырамыз!
Құрметпен,
Көкпекті ауданының мәслихат депутаттары,
Көкпекті ауданының шаруа қожалық басшылары,
Көкпекті ауданының кәсіпкерлері
Көкпекті ауданының ардагерлер кеңесінің мүшелері
«Көкпекті жастары» жастардың патриоттық қоғамдық бірлестігінің мүшелері
