15-21 шілде күндері аралығында Семейде тұңғыш рет пауэрлифтинг және штанганы жатып сығымдап көтеру спорт түрлері бойынша жасөспірімдер мен ерлер, қыздар, әйелдер және ардагерлердің қатысуымен Қазақстан чемпионаты өтуде.
ҚР Спорт және денешынықтыру істері агенттігі мен пауэрлифтинг федерациясының ұйымдастыруымен өтіп жатқан ел деңгейіндегі додаға Қазақстанның 21 қаласынан 250-ден аса спортшы 32 келіден бастап 120 келіден жоғары салмаққа дейін, яғни, 14 салмақ дәрежесі бойынша бақтарын сынауда. Спортшылардың ішіндегі ең жасы кішісі 12 жаста болса, ең үлкені 78 жастағы қария.
Чемпионаттың ашылу салтанатында қалалық денешынықтыру және спорт бөлімінің басшысы Мұрат Құржықаев барша спортшыларға сәттілік тіледі. Елімізде пауэрлифтинг спорты кейінгі жылдары қарқынды түрде дамып келе жатқанын, бұл нағыз батырлар бәсекесі екенін, өйткені, өзінен бірнеше есе ауыр зілтемірді қарсыластарынан әлдеқайда шебер әрі көп көтеру екінің бірінің қолынан келмейтінін айтады жаттықтырушылар. Пауэрифтинг бойынша еліміздің бас жаттықтырушысы Владимир Новоселовтың айтуынша, Қазақстан бұл спорт түрінен әлем бойынша үздік алтылықтың қатарында болса, ал, Азия елдері бойынша көш бастап тұрған көрінеді.
— Пауэлифтинг спорты кейінгі 25 жылда елімізде кеңінен қанат жайып келеді. Алайда, мұндай турнир Семейде алғаш рет өтуде. ШҚО дене шынықтыру және спорт басқармасы мен Семей қаласы әкімдігі осындай шара өткізуге қолдау білдіргендері үшін ризашылығымызды білдіреміз. Жарыс жоғары деңгейде өтуде. Барлық спортшыларға сәттілік тілейміз, — дейді Владимир Новоселов тілшілер тобына берген сұхбатында.
{jcomments on}Чемпионат барысында спортшылармен де сұхбаттасудың реті келген еді. Жас спортшы Ирада Әбдірова:
— Пауэрлифтинг денсаулыққа өте пайдалы спорт түрлерінің бірі. Бұл спорт маған қатты ұнайды. Айналысып жүргеніме 5-6 ай болды. Болашақта спорт шебері атанғым келеді, — дейді.
Ал, пауэрлифтингпен 7 жылдан бері дамылсыз айналысып, ел чемпионаттарымен қатар, Азия және Әлем чемпионаттарында ел намысын қорғап, жүлделі орындарға ие болып жүрген Қостанай қаласының спортшысы Жадыра Қабиева:
— Чемпионат өткізуде жарыстың басы-қасында жүрген азаматтар мен жаттықтырушылар тыңғылықты дайындалыпты. Өз басым Семей қаласына бірінші рет келуім. Әдемі әрі таза қала екен. Алдағы уақытта осындай жарыстарға үнемі келіп тұрамыз деп үміттенемін, — дейді.
Ардагерлер сапында өнер көрсеткен 73 жастағы шымкенттік қарт спортшы Әліпбек Әлжанов болса, жалпы спортқа деген құштарлық бала кезінен басталғанын, осы жасқа жеткенше бірнеше спорттың түрімен айналысып келе жатқандығын айтады.
— 10 жасымнан бастап спортпен айналыса бастадым. Ауылда тұрғанымызда мектеп үйімізге 1,5 шақырым қашықтықта болды. 1 сыныптан бастап 4-5 жыл бойы күнделікті сабаққа жүгіріп барып, жүгіріп қайтып жүрдім. Кейіннен қалаға көшкен соң, бірнеше жыл жеңіл атлетикамен айналыстым. Одан кейін 12 жыл былғары қолғап киіп, бокспен шұғылдандым. Бокс спорт түрі бойынша біршама жетістіктерге қол жеткіздім. Алайда, қарт адамдарға бокспен шұғылдану ауыр екендігі белгілі. Ал, пауэрлифтингтің жөні бөлек. Бұл спорт түрі жас талғамайды әрі денсаулыққа да пайдалы, — дейді Әліпбек Әлжанов.
Турнир қорытындысы бойынша жеңімпаздар кубоктар мен медальдармен және дипломдармен, сондай-ақ, бағалы сыйлықтармен марапатталатын болады. Ең бастысы, сайысқа қатысушылар қыркүйек айында Қырғызстанда өтетін Азия чемпионатына және Венгрияда өтетін әлем чемпионатына жолдама алмақ.
Нұрдәулет КӘКІШЕВ,
«Семей таңы»
