Өткен жұма, 14 қазан күні Семей қаласының әкімі Нұрбол Нұрсағатов Цементшілер кенті, Нахаловка, Бобровка, Западный және Мұрат саяжайының тұрғындарымен кездесу өткізді. Кездесуге қалалық әкімдіктің бөлім басшылары қатысты.
Жадыра ТӨЛЕГЕНҚЫЗЫ,
«Семей таңы»
— Мен күн сайын қала аумағын, шағын аудандар мен кенттерді аралаймын және негізгі мәселе жол, жарықтандыру, санитарлық тазалыққа қатысты екенін білемін. Болашақта біз осы салалар бойынша жұмыс жоспарын жасаймыз,- деді қала әкімі Нұрбол Нұрсағатов.
Кездесуде қала тұрғындарының көпшілігі жолдардың сапасыздығы, жарықтың, судың, балалар алаңдарының болмауы, балабақшалар мен емханалардың жеткіліксіздігі сынды мәселелерді көтерді. Нұрбол Төлегенұлы айтылған барлық шағымдарды қарастырып, шешімдер қабылдауды бөлім басшыларына тапсырды.
№44 орта мектеп оқушыларының ата-аналары балалардың қауіпсіздігі үшін мектеп алдында жаяу жүргіншілер жолы мен белгі орнатуды сұрады. Шаһар басшысы бұл мәселенің жақын арада шешілетінін айтты. Ал Мұрат саяжайының тұрғындарынан түскен сауалдардың көптігіне байланысты жеке кездесу ұйымдастырылатын болды.
— ТҮКШ және қала инфрақұрылымын дамыту саласында көптеген жұмыстар атқарылады. Барлық коммуналдық қызметтер мен мердігерлік ұйымдар өз міндеттерін жауапкершілікпен орындауы тиіс,- деді қала әкімі Нұрбол Нұрсағатов.
Шаһар басшысының тапсырмасы аясында халық пен әкімдік арасындағы байланысты арттыру үшін қаланың шеткері аумақтарында орналасқан елді мекендерде қала әкімінің өкілдері жұмыс жүргізетін болады. Олар бекітілген аудандардағы халықпен тұрақты түрде тығыз қарым-қатынас орнатпақ. Қазір үміткерлер қарастырылуда.
Нұрбол Төлегенұлы өткен аптада сонымен қатар қалалық мәслихат депутаттарымен кездесті. Жиында жақын уақытта шешуді талап ететін қаланы жылумен жабдықтау, қатты тұрмыстық қалдықтарды шығару, қоғамдық көлік жұмысын реттеу, көшелерді жарықтандыру, жолдарды жөндеу, көп қабатты үйлердің аулаларын абаттандыру, балалар алаңдарын орнату сынды бірқатар өзекті мәселелер талқыланды.
Кездесу барысында әрбір депутат өз округіндегі және қаладағы шешімін күткен мәселелер туралы айтып берді. Шығыс, Северный кенттері, Жедел медициналық жәрдем ауруханасы, зағиптар қоғамы аудандарындағы су басу қаупі туралы да айтылды.
Қала басшысы кездесуде айтылған мәселелерді шешу үшін аталған аудандарға депутаттармен бірге барып, кеңес өткізетін болады.
