Жыл сайын 18 қазан күні елімізде Рухани келісім күні аталып өтеді. Биыл да еліміздің барлық өңірлерінде түрлі іс-шаралар ұйымдастырылуда. Ал Семей қаласындағы М.О.Әуезов атындағы педагогикалық колледжде жергілікті діни бірлестіктер басшыларының қатысуымен дөңгелек үстел өтті.
Саяжан КЕРІМБЕКОВА
«Семей таңы»
Алқалы жиынға Абай облысы Қоғамдық даму басқармасының басшысы Айдар Садырбаев, М.О.Әуезов атындағы педагогикалық колледж басшылығы, діни бірлестіктердің қызметкерлері және БАҚ өкілдері қатысты.
Іс-шараны Абай облысы Қоғамдық даму басқармасының басшысы ашып берді.
— Рухани келісім күнін атап өтіп келе жатқанымызға биыл 30 жыл толып отыр. Осы мерейтойда өздеріңізбен кездесіп отырғанымызға ризашылығымды білдіремін. Сіздердің өмірлік тәжірибелеріңізді, рухани адамгершілік қасиеттеріңіз бен пайым-парасаттарыңызды пайдалана отырып, біз қоғамға өзіміздің жұрнақтай пайдамызды тигізсек, рухани-адамгершілік тұрғысынан қоғамымыздың кемелденуіне күш салсақ, біздің де миссиямыз орындалады деп ойлаймын. Бүгінгі іс-шараны дәл осы қазақ педагогикасының қара шаңырағы, 119 жылдық тарихы бар тұңғыш кәсіби оқу орны, кешегі Мұхтар Әуезов бастаған ұлттың ұлы тұлғаларын қанаттандырған киелі жерде өткізуіміздің үлкен символикалық мәні бар. Бұл, ең алдымен, Абай есімін иеленген облысымыздағы қасиетті қара шаңыраққа, осында білім алған ұлт зиялыларына жасаған тағзым, құрметіміз. Қазіргі таңда қоғамның рухани кемелденуіне жастарға сапалы біліммен қатар, саналы тәрбие беруімен өз үлесін қосып жатқан білім ордасының тыныс-тіршілігімен танысу мақсатында және Мұхтар Әуезовтің 125 жылдық мерейтойы аясында біз де қоғамымыздың көшбасшыларын, көптің ішінде өзіндік орны бар азаматтардың басын қосып, кеңес құруымыздың жөні де, жолы да оң деп есептеймін, — деді Айдар Садырбаев.
Егемендік алғаннан бері бұл күнді ерекше атап өтудегі мақсат — еліміздегі 18 діни конфессия мен 130-ға жуық ұлт өкілдіренің басын біріктіру, тұрақтылық пен тыныштықты сақтау. Бүгінгі таңда рухани келісім көптеген елдер үшін бірінші кезектегі міндетке айналды. Осы жағдайда Қазақстан ұлттың бірлігіне негізделген тұрақтылықты көрсетіп отыр. Елімізде өмір сүретін этностардың ауызбірлігі мен толеранттылығы егемендігімізді орнықтыру жолындағы күрделі кезеңдерден өтуге жәрдемдесті және әлі күнге дейін ел дамуына үлкен күш-қуат беріп отыр.
— Бұл күннің басты мақсаты – жер бетінде болып жатқан қақтығыстар мен жанжалдарға тосқауыл қою. Осындай түйткілді мәселенің алдын алу үшін елімізде дәстүрлі түрде әлемдік және дәстүрлі діндер көшбасшыларының съезі өткізіліп келеді. Маңызды мәселелердің түйінін бірлесе шешіп, ізгі бастамалардың ел іргесінде көтерілуі Қазақстанды бейбітшіліксүйгіш, тәуелсіздіктің бағасын білетін мемлекет ретінде дүние жүзіне танытып келеді. Рухани келісім күні негізінде біздің ұлтымызға тән үлкенді сыйлау, отбасыға құрмет, балаларға қамқорлық, татулық, ауызбіршілік, достық сынды ізгі ортақ құндылықтар берік орнады. Халқымыздың татулығы мен бірлігі еліміздің өркендеп, алға басуына негіз бола алды. Осы құндылығымызды қадірлей білу, оны жас ұрпақтың жүрегіне ұялату ел болашағының жарқын болуына кепіл болмақ. Олай болса, барша халықты мейірімділікке, изгілік пен бірлікке үндейтін мереке құтты болсын! — деді Абай облысының бас имамы Асқар Мұқанов.
Жиын барысында дінаралық қатынастар мен рухани келісімді нығайту мәселелері талқыға салынды. Сонымен қатар қаламыздағы діни бірлестіктер мен этномәдени орталықтардың осы бағытта атқарылар шараларға қосар үлесі мен игі істері сараланып, қаламыздағы рухани тұрақтылық пен келісімнің болашақтағы даму мүмкіндіктері мен жолдары қарастырылды.
Іс-шара соңында Абай облысы Қоғамдық даму басқармасының басшысы Айдар Садырбаев діни бірлестіктер басшыларына алғыс хаттар мен сыйлықтар табыстады.
