14 қазан күні Абай облысы білім басқармасының ұйымдастыруымен және Қазақстандық қоғамдық даму институтының қолдауымен «Балалар әлемі» жобасы шеңберінде республикалық балалар оқулары байқауының облыстық кезеңі өтті. Облыстық байқауға Абай облысына қарасты екі қала мен 8 аудан көлемінде өткен бірінші кезеңде жоғары нәтиже көрсеткен 25 оқушы қатысты.
Дана ТАЛҒАТБЕК,
«Семей таңы»
Қазақстандық қоғамдық даму институтының бағдарлама жобалары басқармасының жоба менеджері Руслан Беген байқаудың мақсатымен таныстыра келе сайыскерлерге ақ тілегін білдірді.
- Мемлекет басшысы Қ.Тоқаев ұлттық қоғамдық сенім кеңесінің ІV отырысында кітап оқитын ұлтты қалыптастыру үшін жас қазақстандықтар арасында оқу мәдениетін дамытуға және ілгерлетуге ерекше назар аударғаны белгілі. Осы мақсатта ұйымдастырылып отырған республикалық байқау ҚР Ақпарат және қоғамдық даму министрлігі мен Қазақстандық қоғамдық даму институтының қолдауымен биыл екінші рет ұйымдастырылды. Бұл байқауға еліміздің 17 өңірі мен 3 республикалық маңызы бар қалалардың оқушылары қатысуда. Байқаудың мақсаты – балалардың кітап оқуға деген құштарлығын арттыру, қазақ және шетел әдебиетін, ақын-жазушыларының шығармаларын терең зерттеуге шақыру және жас ұрпақтың бойына отансүйгіштік сезімді қалыптастыру. Өсіп келе жатқан өрендер еліміздің бетке ұстар азаматтары болып, тәуелсіз Қазақстанымызды әлемдік аренада одан әрі танытуға өз үлестерін қосатынына сенімдімін, — деді Руслан Тұрсынбетұлы.
Облыстық байқауды ұйымдастыру барысында жас ұрпақты кітап оқуға бейімдеу және оқу сауаттылығын арттыру, жылдам оқуы, логикалық, сыни тұрғыдан ойлау қабілеттерін дамыту және сананың ашықтығын қалыптастыру міндеттері қойылды. Байқауға оқушылар «Әдебиет порталы» интернет-жобасында ұсынылған қазақстандық және шетелдік кітаптар бойынша дайындалғанын атап өтейік. Бұл ретте қатысушылар, жас ерекшелігі мен оқу бағдарламасына сәйкес, төрт номинация бойынша бақтарын сынады, атап айтқанда 3-4 сынып – «Ертегілер әлемінде», 5-6 сынып – «Кел, балалар, оқылық!», 7-8 сынып – «Ғасырлар тарихты жырлайды», 9-10 сынып – «Ұлы Дала жырлары» және «Ұлы Дала ұлағаты».
Байқауда қатысушылар алдымен тест сұрақтарына жауап беріп, одан соң берілген шығармалар бойынша эссе жазды.
Байқау қорытындысы бойынша, Шұғыла Жұмаханова (Абай ауданы), Айзере Сайлаубек (Ақсуат ауданы), Ұлпан Айдынқызы (Ақсуат ауданы), Әмина Қайролла (Аягөз ауданы) І орынды жеңіп алып, республикалық кезеңге жолдама алды.
Жүлделі ІІ және ІІІ орындарға ие болған оқушыларға басқарма атынан әдеби кітаптар
