Семей қаласында «Сенімен Болашақ» республикалық қоғамдық бірлестігі мен Жастар ресурстық орталығының бірлесе ұйымдастыруымен «Ұшқын» сөз өнері байқауы өтті.
«Ұшқын» сөз өнері байқауы өткен жылы қалалық деңгейде өткізілген болатын. Биыл ауқымы кеңейіп, облыстық деңгейде ұйымдастырылды.
— Мақсатымыз — қолына қалам ұстаған жастарымыздың дарынын шыңдау, проза жанрын жаңа деңгейде насихаттау. Екі кезеңнен тұратын бұл байқауға 14-22 жас аралығындағы жастар қатыса алады. Бүгін облыстық кезеңге жолдама алған 60 өрен өз бақтарын сынауда. Болашақта республикалық деңгейде өткізу жоспарда бар,- дейді байқау ұйымдастырушысы Қайсар Беделхан.
Сөз өнері байқауына төрелік еткен әділ қазылар алқасында профессор, «Сенімен болашақ» республикалық ата-аналар қоғамдық бірлестігінің Абай облыстық филиалының директоры Аман Қапанұлы, филология ғылымдарының магистрі Медет Рақымбаев, Қазақстан Жазушылар одағы Семей қалалық филиалының директоры Мерей Қарт, PhD ғылымдарының докторы Гүлнұр Мүрсәлім, ХVI Халықаралық «Шабыт» фестивалінің жеңімпазы, жазушы Қуат Қиықбай болды.
— Бүгінгі байқауға қатысу — мен үшін үлкен мәртебе. Әрине, жүлдеге ие болсам деген ой да бар, алайда өзіммен қатарлас жігерлі жастармен бәсекеге түсіп, әр түрлі ой мен пікірлерді, түрлі көзқарастарды тыңдау — мен үшін өте қызық,- дейді Павлодар облысынан келген қатысушы Дабылхан Әлішер.
Байқау қорытындысы бойынша, М.Әуезов атындағы педагогикалық колледж студенті Жұлдыз Байдүйсенова жеңіске жетті, 2-ші орынды Павлодар облысы атынан қатысқан Әлішер Дабылхан мен Геологиялық барлау колледжі студенті Сұлтан Бақтығали еншіледі. 3-ші орынға Мерейлім Қазақбаева, М.Әуезов атындағы педагогикалық колледж студенті Нұржамал Айтжанова, №38 жалпы орта білім беретін мектеп-лицей оқушысы Мадина Нығымет ие болды. «Жас қалам» аталымы бойынша М.Әуезов атындағы педагогикалық колледжі Эльназ Құрманбаеваға, «Сөз шебері» аталымы бойынша Қалматаев атындағы мемлекеттік медициналық колледжі студенті Жанерке Сәрсенге ақшалай сыйлықтар табысталды. Барлық қатысушылар мен олардың жетекшілері алғыс хатпен марапатталды.
Зарина КӘП,
«Семей таңы»
