Қазақстан президенті Қасым-Жомарт Тоқаев Алматы облысы тұрғындарымен кездесуде қаңтар оқиғасын еске алып, бұзақылар мен лаңкестерден батыр жасаудың қажеті жоқ екенін тағы бір қайталады, деп хабарлайды Stan.kz ақпарат агенттігі.
«Елдің президенті ретінде, мен үшін әділдік – ең жоғары құндылық. Сондықтан менің Әкімшілігімде азаматтардың өтініштерін қабылдаумен және олардың талап-тілектерін қарастыруымен айналысатын арнайы бөлім бар. Бұл жұмысты өз бақылауымда ұстаймын. Биылғы 9 айда менің атыма 41 мың өтініш келіп түсті, олардың әрбір төртіншісі құқық қорғау органдарының қызметіне және сот шешімдеріне қатысты. Бұл құқықтық реформаны жалғастырудың маңыздылығын көрсетеді», — деді Тоқаев.
Мемлекет басшысы елімізде заң үстемдігі болуға тиіс екенін онсыз қоғамдық тәртіп орнату мүмкін емес екенін баса айтты.
«Басқаша айтқанда, ішкі саясатымызда заң мен тәртіпті басшылыққа аламыз. Тек сонда ғана біз азаматтарымыздың игілігіне бағытталған экономикалық реформаларды тиімді жүргізу үшін қолайлы жағдай жасай аламыз. Заң мен тәртіп мемлекетіміздің беделіне шын мәнінде нұқсан келтірген қайғылы қаңтар оқиғасының қайталануына жол бермеуге мүмкіндік береді», — деп жалғады ол.
Тоқаев қаңтар оқиғаларынан сабақ алып, бұзақылар мен лаңкестерден батыр жасаудың еш қажеті жоқ екенін тағы бір қайталады. Сөзінше, әлі күнге дейін қаңтар оқиғаларын қайталуды қалайтындар бар. Сонымен қатар белгілі бір күштердің жетегіне ерген және кішігірім қылмыстар жасағандарға рақымшылық жариялағанын еске салды.
«Ал бұзақыларды, кісі өлтірушілерді, тонаушыларды қолдауға тырысатындардан сақ болу керек. Олар халқымыздың түпкі мүддесіне мүлдем сай келмейтін жеке мақсатты көздейді. Жуық арада мемлекетке сатқындық жасағандар, екіжүзділік және қорқақтық танытқандар сот алдында жауап береді», — деп ескертті мемлекет басшысы.
Президент қайғылы жағдайға жол берген немесе арандатушылық әрекет жасағандардың істері бойынша тергеу жалғасатынын айтты.
