Семейде 2022 жылдың 20 қарашасында өтетін кезектен тыс президенттік сайлауға дайындық жұмыстары жүріп жатыр. Семей өңірінде, аумақтық сайлау комиссиясын қоспағанда, барлығы 149 учаскелік сайлау комиссиясы бар. Кезектен тыс сайлауға дайындық жұмыстары туралы Семей қаласы аумақтық сайлау комиссиясының төрағасы Зейнолла Тоқаевтан сұрап білген едік.
Ж.ТӨЛЕГЕНҚЫЗЫ,
«Семей таңы»
— Биылғы жылы біздің елімізде, облысымызда, қаламызда үлкен өзгерістер орын алды. Олай дейтінім, осы жылдың 20 қарашасында кезектен тыс сайлау өткізіп, еліміздің Президентін сайлаймыз. Ал облыс деңгейіндегі өзгеріске келсек, 25 жыл аңсап келген әділеттілікке қол жеткіздік. Облысымыз қайтадан жаңғырып, оған Абай есімі берілді, Семей қаласы сол облыстың орталығы болып жарияланды. Бұны біздің аймақ тұрғындары зор қуанышпен қабылдады. Өйткені кезінде біздің қала губерния орталығы болған. Ол кезде көрші Павлодар мен Өскемен уездік деңгейдегі қалалар болатын. Оның үстіне Семейдің өзге қалалардан ерекшелігі — ұлтыздың ұлы тұлғалары, Алаш қайраткерлері осы жерде оқып, білім алды. Семей алашордалықтар ту тіккен қала болғандықтан, бүкіл Қазақстан біздің қуанышымызға ортақ болды. Мұның барлығын айтып отырған себебім алдымыздағы Президент сайлауы – бізге үлкен сын. Басқа мемлекеттердің барлығы бізге көз тігіп отыр. Жергілікті жердегі облыстық аумақтық сайлау комиссиясы, қалалық сайлау комиссиясы осы сайлауды жоғары деңгейде өткізу үшін барлық мүмкіндіктерді жасап, әзірлік жасап жатыр. Сайлау ашық әрі әділ өтетініне сенімдіміз,- дейді Зейнолла Тоқаев.
«ҚР Сайлау туралы» Заңына сәйкес, тұрғындар тұрғылықты мекенжайы бойынша учаскелік сайлау комиссияларына барып, дауыс беруі қажет. Егер сайлаушы тіркелген мекенжайынан басқа аумақта тұрып жатса немесе өзге өңірге сапарлап келсе, 20 қазанға дейін тұрғылықты жері бойынша учаске тізіміне енгізу үшін тиісті әкімдікке өтініш беруі керек. Ал тұрақты тіркеуі жоқ азаматтар орналасқан жері бойынша әкімдіктерге берілген жазбаша өтініш негізінде тізімдерге енгізіледі. Сайлаушылар тізіміне қатысты ақпараттарды әкімдіктердің сайты немесе Call-орталығы арқылы білуге болады.
— Бұрын учаскелік комиссия мүшелері өз аумақтарындағы әр үйді аралап, сайлауға қатысушылар туралы нақты мәлімет жинайтын. ҚР Орталық сайлау комиссиясының талабы бойынша, енді мұндай жұмыстар жүргізілмейді. Себебі барлық ақпарат арнайы жүйеден шығып отыратын болады. Облысымыздың, қаламыздың тұрғындары Абай атамыздың есіміне көлеңке түсірмей, жоғары мәдениеттілік танытып, алдағы сайлауға бір кісідей қатысады деп үміттенемін. Бұрын да семейліктер сайлауға белсенді қатысатын, қазір жауапкершілік жүгі еке есе артқанын сезінуіміз керек. Референдумға Семей өңірінен 252 мың адам қатысқан болатын, — деді З.Тоқаев.
«ҚР Сайлау туралы» Заңына сәйкес, қазір барлық дайындық жұмыстары жүргізіліп, материалдық жабдықтармен қамтамасыз етілуде. Аумақтық сайлау комиссиясы барлық шараның заң шеңберінде жүзеге асуын, сайлаудың ашық әрі әділ өтуін қадағалайтын болады.
