Сәрсенбі, 19 қазан күні Семей қаласындағы Жастар мен балалардың шығармашылық сарайында ҚР Құтқарушылар күніне арналған салтанатты шара өтті. Мерекелік жиынға Абай облысы Төтенше жағдайлар департаментінің 200-ден аса қызметкері, сала ардагерлері мен арнайы шақырылған қонақтар қатысты.
Дана ТАЛҒАТБЕК,
«Семей таңы»
Жиналғандар алдымен Абай облысында өртті жою кезінде ерлікпен қаза тапқан Айдос Тоғызбаевты және қызметтік борышын орындау кезінде өз өмірін қиған барлық қызметкерлерді еске алып, олардың рухына тағзым жасау үшін бір минут үнсіздік жарияланды.
ҚР ТЖМ министрі Юрий Ильин салтанатты жиынға қатысушыларды кәсіби мерекемен бейнебайланыс арқылы құттықтады.
Бейбіт күннің батырларын төл мерекелерімен Абай облысының Төтенше жағдайлар департаментінің бастығы полковник Манарбек Шапағатов та құттықтап, азаматтық қорғаныс саласында көп жылдар бойы еңбек еткен ардагерлерге ізгі тілегін білдірді.
— Құрметті әріптестер, мерекеміздің қонақтары мен ардагерлер! Қазақстанның Төтенше жағдайлар министрлігі биыл 27 жылдығын тойлап отыр. Бұл мерекені біз жаңадан құрылған облысымызда алғаш рет атап өтудеміз. Абай облысының Төтенше жағдайлар департаменті жақында ғана құрылғанына қарамастан, төтенше жағдайлардың алдын ала алатынын көрсетті. Осыған дейін облыс көлемінде құтқарушылар дабыл бойынша 1100 рет шығып, 21 адамды құтқарды. Төтенше жағдайлар аймағынан 200-ден астам адам көшірілді. Бүгінде біздің бөлімше өз міндетін тиісті нормативтерге сәйкес орындайды, материалдық-техникалық құралдармен қамтамасыз етілген. Құтқарушылар, Үкімет пен министрліктің қойылған тапсырмаларына сәйкес, өз міндеттерін орындауға дайын. Бүгінгі мерекелік жиында біз қызмет барысында ерекше батылдық танытқан азаматтардың барлығына алғыс сезімін білдіріп, жұмыстарына табыс тілегіміз келеді, — деді Манарбек Қайыргелдіұлы.
Оның айтуынша, облыстық құтқарушы қызметі тек өрт сөндірушілерді ғана емес, сонымен қатар судан құтқару қызметі, кинологиялық қызмет, апаттар медицинасы орталығының қызметтерін қамтиды. Құтқарушылардың қызмет аясы жан-жақты болғанымен, олардың барлығы бір мақсатқа – адам өмірі мен мүлкін қорғап, төтенше жағдай кезінде орын алған барлық жағымсыз салдарды жоюға бағытталады.
Салтанатты жиында төтенше жағдайлар кезінде ерекше көзге түскен және көп жылдар бойы лайықты қызмет атқарып жүрген бірқатар қызметкерлер ведомстволық наградалармен, Төтенше жағдайлар министрлігінің, облыс басшылығының, Полиция департаментінің алғыс хаттарымен марапатталды.
— Өрт сөндіру мамандығы жоғары біліктілікті және батылдықты қажет етеді. Бұл ретте Құтқарушылар күні қарсаңында Абай облысының орталығы Семей қаласына келіп, марапаттарға ие болып жатырмыз. «Төтенше жағдайлардың алдын алуда және жоюда үздік шыққаны үшін» төсбелгісімен марапатталуым еңбегімнің еленгені деп білемін. Әрине, әріптестеріміздің батылдықпен қабылдаған әр шешімі, жасаған ерлігі бағаланып жатқаны қуантады. Мен өз мамандығымды мақтан етемін және барша жастарды біздің қатарға қосылуға шақырамын, — дейді №18 өрт сөндіру бөлімінің бастығы, азаматтық қорғау майоры Сырым Заданов.
Мерекелік шара жергілікті өнерпаздардың концертіне ұласты.
