Республика күніне орай, 20 қазан күні Семей қаласының Мәңгілік ел көшесінің бойынан Авиценна жоғары медициналық колледжінің жаңа корпусы ашылды. Ашылу салтанатына Абай облысы әкімінің орынбасары Шалқар Байбеков, Қоғамдық даму басқармасының басшысы Айдар Садырбаев қатысты.
Жадыра ТӨЛЕГЕНҚЫЗЫ,
«Семей таңы»
Бүгінде колледждің үш оқу ғимараты бар. Ал жаңа оқу корпусының құрылысы 2018 жылы басталған. Республика күніне орай қолданысқа берілген жаңа ғимаратта теориялық және тәжірибелік кабинеттер, акт және спорт залы бар, сондай-ақ асханамен жабдықталған. Мұнда екі ауысымда 600 студент білім алады.
— Студенттердің сапалы білім алуы үшін ең алдымен жақсы материалдық-техникалық база қажет. Болашақ мейіргерлер осы жерден барлық ілімді бойларына сіңіріп, емханаға дайын маман күйінде барады. Кейін науқастармен жұмыс істеу оларға әлдеқайда жеңілірек болады. Себебі студенттер жұмысқа орналасқанда өздеріне нық сенімді болуы керек, ол үшін қажетті жағдайдың бәрі жасалып отыр. Оқу орнының құрылтайшысы және директоры ретінде менің алдымдағы жауапкершілік жүгі ауыр. Колледждің материалдық-техникалық базасын үнемі жаңғыртып отыру қажет. Себебі медицина саласы бір орнында тұрмайды. Мақсатымыз – тек Абай облысы емес, Қазақстан бойынша үздік оқу орындарының қатарына ену,- дейді колледжің бас директоры Оксана Федорова.
Колледж жаңа инновациялық технологиялармен жабдықталуда. Мәселен, соңғы үлгідегі «Пирогов» интерактивті анатомиялық үстелі, сондай-ақ педиатрия және терапия саласындағы роботтар адам анатомиясындағы паталогияларды көруге, өзгерістерді анықтауға, жүрек соғысын, тыныс алуды тыңдауға мүмкіндік береді.
Айта кетейік, колледж студенттері «Жалпы медицина», «Мейірбике ісі», «Фармация», «Ортопедиялық стоматология», «Гигиена және эпидемиология» мамандықтары бойынша білім алуда. Сонымен қатар «массаж жасаушы», «косметолог» қосымша біліктіліктерін де алып шығуға болады.
