Шәкәрім университетінде «AMANAT» партиясы Абай облыстық филиалының «Жастар рухы» жастар қанатының бастамасымен «Рухтастар cases» тақырыбында диалог алаңы ұйымдастырылды. Жиынға облыстық мәслихат депутаты Айбек Нұғымаров, жазушы Қуат Қиықбай және студент жастар қатысты. Шараның басты мақсаты – жастарға жетістікке жеткен тұлғаларды насихаттау, білім мен ғылымда озат болуға шақыру.
Талшын ҚАЛИАСҚАР,
«Семей таңы»
— Диалог алаңына әрбір оқу орнының және қаламыздың белсенді жастары келді. Бұл, ең алдымен, жастардың ойын, пікірін тыңдап, Президент Жолдауына байланысты көзқарастарын білу үшін ұйымдастырылған шара, — дейді «Жастар рухы» жастар қанатының төрағасы Темірлан Бахтияров.
25 қазан — Республика күніне орай ұйымдастырылған шараның бүгінгі тақырыбы ҚР Президенті Қ.Тоқаевтың соңғы Жолдауына арналды. Диалог алаңында сондай-ақ ел жастарының бүгіні мен болашағы туралы да сөз болды. Осындай шаралар жастардың өзін еркін сезінуіне, аға буын өкілдерімен байланыс орнатуларына ықпал етеді, оларды әрі қарай жетілуге, алға қадам басуға ынталандыра бермек.
Кездесу барысында танымал жас жазушы Қуат Қиықбай жастарға ақыл-кеңесін айтып, бағыт-бағдар сілтеді.
— Біз жастармен кездесіп, көкейлерінде жүрген ойларын тыңдағымыз келеді. Біздің жұмысымыз жас буынмен байланысты болғандықтан олардың мәселелеріне де қанықпыз. Тұрғылықты мекенжайының болмауы сынды проблемалар студенттердің білім сапасына әсер ететінін білеміз. Қаламызға алыс-жақыннан әділет іздеп келетіндер де бар. Әділет іздеу дегеніміз — ақиқаттың түпкі астары, білім, ғылымға талпыну, — деді жазушы Қуат Қиықбай.
Кездесуде Семей қаласының тарихы мен өркендеуі туралы да сөз қозғалды. Қатысушылар Абай облысы болып құрылғаннан бергі шаһардағы өзгерістер, әлеуметтік жағдай, тұрғындардың тұрмысы жайында пікірлесіп, өз ойларын бөлісті.
Қуат Қиықбай бүгінгі күннің басты мақсаты жастарға сапалы білім беру екендігін айтып өтті. Өйткені нағыз білімді азамат қана Отанымыздың гүлденуіне үлес қоспақ.
— Білім беріп қана қоймай, өскелең ұрпаққа ұлттық дәстүрде тәрбие беруіміз қажет. Бүгінде мені қазақылықты, тіл мен дәстүрді ұмыта бастаған қаракөз қарындастарымыз бен бауырларымыз алаңдатады. Осы мәселелердің барлығы үнемі айтылып, қозғалуы керек, — деді жазушы.
Диалог алаңына қатысқан университет студенттері қонақтарға сауалдарын қойып, өз ой-пікірлерін ортаға салды.
