Семей қаласының №4 жалпы орта білім беретін мектебінде қалалық білім бөлімінің ұйымдастыруымен «Педагог» кәсіби стандартының негізгі ережелерін түсіндіру бойынша семинар өтті. Жиынға білім бөлімінің мамандары, мектеп директорлары мен әдіскерлері және мұғалімдер қатысты.
Талшын ҚАЛИАСҚАР,
«Семей таңы»
Еске сала кетейік, Қазақстан Республикасы Оқу-ағарту министрлігі ұстаздың кәсіби құзыреттілігінің нақты шеңберін анықтау мақсатында жаңа буын «Педагог» кәсіби стандартын дайындады. «Педагог» жаңа буын кәсіби стандарты педагогтің еркінділік шекарасын кеңейтуге мүмкіндік береді, бұл ретте оның еңбек нәтижелері үшін жауапкершілігін арттырады, нақты бағалау критерийлерін ұсына отырып, оның біліктілігіне қойылатын талаптарды ұсынады. Кәсіби стандарттың мақсаты — педагогтердің кәсібилігі мен сапасын арттыру үшін мектептерді, педагогикалық жоғары оқу орындарын, біліктілікті арттыру ұйымдарын, білім басқармаларын біріктіру. Қазіргі күні кәсіби стандартты, оның мақсаттарын, қолдану салаларын жан-жақты талдау үшін педагогикалық ұжымдар арасында кәсіби стандарттың мазмұны бойынша кең ауқымды түсіндіру жұмыстары жүргізілуде.
— Стандарт дегеніміз қалып, өлшем дегенді білдіреді. Өздеріңіз білесіздер, 2019 жылы Президент «Педагог» мәртебесі туралы Заңға қол қойды. Ал кәсіби стандарт бізге не үшін керек? Бұл білім алушылардың және ұстаздардың кәсіби әлеуетін көтеруді, жақсы білімге қол жеткізуді көздеп отыр, — деді Шәкәрім атындағы гимназия директорының орынбасары Нұргүл Мұқанова.
Жиын барысында «Өрлеу» біліктілікті арттыру орталығы» АҚ филиалы Абай облысы бойынша педагогикалық қызметкерлердің біліктілігін арттыру орталығының тренері Г.Құрманғалиева, №40 мектеп директоры А.Қуанышбаева, №6 мектеп-гимназиясы директорының орынбасары Б.Масалимова және №25 ЖОББМ директорының орынбасары К.Омарова баяндама “Педагог” кәсіби стандартының ерекшеліктері туралы баяндама жасады.
— Бұл жоба әлі заңды түрде бекіген жоқ. Сондықтан ұстаздар қауымының әлі де өз ұсыныстарын айтуға, өзгерістер енгізуге мүмкіндіктері бар. Заманауи қоғамда мұғалімнің рөлі өте маңызды болғандықтан, педагогтерден көп үміт күтіледі. «Педагог» кәсіби стандартын талқылау барысында жаңа ұсыныстар енгізілуі керек, — дейді №40 мектеп директоры Айжан Қуанышбаева.
Оқу-ағарту министрі Асхат Аймағамбетов «Педагогтердің құзыреттілік шеңбері» — «Педагог» кәсіби стандарты жыл соңына дейін дайындалып, тәжірибеге енгізілетінін айтқан болатын.
