Облыстық мәслихаттың кезектен тыс сессиясында жануарларды аулаудың, уақытша ұстаудың және жансыздандырудың қағидалары бекітілді.
Бибі ТӨЛЕГЕНҚЫЗЫ,
«Семей таңы»
Аталған қағида бойынша қаңғыбас жануарлардың санын жансыздандыру арқылы реттеуге тыйым салынады. Құжатта өңірдегі қаңғыбас жануарларға қатысты іс-қимылдар тәртібі айқындалған.
«Жануарларды аулау Аулау жануарға жарақат салуды және мертігуді, азаматтардың денсаулығына, олардың мүлкіне, заңды тұлғалардың мүлкіне, қоршаған ортаға зиян келтіруді болдырмайтын ізгілікті тәсілдермен жүзеге асырылады. Ауланған жануарлар уақытша ұстау орнында немесе жануарларға арналған баспаналарда орналастырылады және дерекқорда тіркелуі тиіс», − делінген құжат жобасында.
Ережеге сәйкес, адамға, жануарларға шабуыл жасаған немесе адамның өмірі мен денсаулығына қатер төндіретін қараусыз қалған және қаңғыбас иттерді, жануарларды, оның ішінде топтасқан иттерді мекендеу ортасынан аулау кезінде дәрілік жолмен жансыздандыруға (эвтаназияға) жатады.
Облыстың ветеринария басқармасы басшысының міндетін атқарушы Ержан Барышев Қағидаларды орындауға қажетті қаржыландыру көзделгенін жеткізді.
