Шығыс Қазақстан облысының Зайсан ауданында мешіт жанынан қайырымдылық мекемесі ашылды, деп хабарлайды ҚазАқпарат.
Республика күні қарсаңында ашылған Шараға өңірдің зиялы қауым өкілдері, жергілікті тұғындар мен қатар аудан әкімі қатысты.
Медресенің құрылысы 2021 жылдың 5 қазанында басталған, бүгін қолданысқа берілді.
Қайырымдылық мекемесінің бой көтеруіне аудан кәсіпкерлері, азаматтар қаржылай, материалдық көмектер көрсетіп, халықтың береке-бірлігінің нәтижесінде жұмыстар сәтті аяқталды. Міне, бүгін аудан халқының күшімен салынған медресе қолданысқа берілді.
Жаңа нысанның салтанатты ашылуымен және Республика күні мерекесімен аудан әкімі Дулат Қажанов құттықтады.
Аудан әкімі Дулат Зайсанбекұлы осындай игі бастамаға қол ұшын созып, бір кісідей атсалысқан барлық азаматтарға аудан жұртышылығы атынан зор алғыс айтты.
«Жастарымызды имандылық, ізгілік жолына тәрбиелейтін, тағылым беретін, білім нәрін құйып, ғылым үйрететін медресенің жұмысына сәттілік тілейміз. Баршаларыңыздың отбасыларыңыз аман, жұмыстарыңыз табысты, ел іргесі тыныш, тәуелсіздігіміз баянды болсын», — деді Зайсан ауданының әкімі Дулат Қажанов.
