Семей қаласындағы «Жанұя» орталығы қиын жағдайға тап болған отбасыларға
жан-жақты қолдау көрсетіп келеді. Сондай қайырымдылық шараларының бірі 22
қазан күні өтті. Төрт бала тәрбиелеп отырған жалғыз басты ана Ольга Сергееваға
тоқыма құрылғысы тарту етілді. Шараға «Жанұя» орталығының президенті Жанна
Жибраева және орталықтың ардагер волонтерлер қатысты.
Мұқтаж жандардың қамқоршысына айналған «Жанұ»я орталығында азаматтарға тегін
әлеуметтік, психологиялық және құқықтық көмек көрсетіледі. Бұл жолы жалғыз басты ана
Ольга Сергееваға кәсібін бастауға көмектесу мақсатында тоқыма құрылғысы тарту етілді.
Игілікті іске «Шүлбі СЭС» АҚ әкімшілігі демеуші болыпты.
— Біз Ольганы алғаш әлеуметтік желіден көрдік. Телефон нөмірін тауып, орталыққа
шақырдық. Алдымен оған психологиялық көмек көрсетілді. Ольганың екі баласы сырқат
екен. Квота алып, Астана қаласынан ем алуына көмектестік. Азық-түлікпен де
жәрдемдестік. Бірақ Ольганың аяғынан тік тұрып, отбасын өзі асырағысы келетінін
байқадым. Демеушілерімізбен байланысып, ортақ мәмілеге келдік. «Шүлбі» су электр
станциясы әкімшілігі көмек көрсетіп, тоқыма станогын алып берді. Қоғамда Ольга секілді
әйелдер көп. Оларға балық емес, қармақ керек,- дейді Жанна Жибраева.
Бұған дейін Ольга Сергеева мемлекеттен қайтарымсыз грант алып, бизнес бастауға
ниеттенген екен. Бірақ жұмысы болған соң, бағдарлама шартына сәйкес келмепті.
— Сырқат екі балам болғандықтан, толық күн жұмыс істеуге жағдайым болмады. Сол
себепті «Бизнес Бастау» бағдарламасы арқылы шағын кәсіп ашпақ ойым болған. Бірақ,
бағдарлама шартына сәйкес, грантты алуға үміткерлер жұмыссыз болуы керек екен.
Балаларыма нан тауып беруім керек қой, жұмыссыз отырсам, отбасымды кім асырайды?!
Менің жағдайыма бейжай қарамаған «Жанұя» орталығының ұжымына алғысым шексіз.
Бұл менің табысқа жетуімнің алғашқы қадамы деп білемін,- дейді Ольга Сергеева.
Отырыс барысында волонтер ардагерлер Ольгаға жылы тілектерін білдіріп, болашақ ісіне
сәтті қадам тіледі.
Айтолқын САМАТОВА,
«Семей таңы»
