Көкпекті ауданындағы Көкжайық ауылында Республика күні мерекесі қарсаңында
су құбыры іске қосылып, көпсалалы спорт залы ашылды. Нысандардың ашылу
салтанатына аудан әкімі Ділдабек Оразбаев арнайы барып қатысты.
Бүгінгі күні Көкжайық ауылындағы 296 шаңырақта 1079 адам тұрады. Осыған дейін
Көкжайық ауылының тұрғындары таза ауыз суды жеке өздері қаздырған үй құдықтарынан
алып жүрген еді. 2019 жылы басталған су құбыры желілерінің құрылысы, міне, биыл
аяқталып, қолданысқа беріліп отыр.
Жоба бойынша су құбыры желісі әр үйдің қақпасына дейін ғана әкелінуі керек. Алайда
мердігер компания тұрғындарға қолдау көрсетіп, барлық үйдің ішіне дейін суды өз
қаражатына тартып беріпті.
— Мемлекет басшысының тапсырмасы бойынша 2025 жылға қарай еліміздің барлық елді
мекендері орталықтандырылған сумен қамтамасыз етілуі қажет. Президент қойған
міндетті орындау мақсатында бүгінгі күні Үлкенбөкен, Преображенка және Үлгілімалшы
ауылдары бойынша үш жоба жүзеге асырылуда. Жақын арада аталған ауылдарда су
құбырын іске қосуды жоспарлап отырмыз. Осы орайда Көкжайық ауылындағы су
құбырының құрылысымен айналысқан мердігер компания «Қуандық и К» ЖШС
өкілдеріне ерекше ризашылығымды білдіремін. Себебі жоба бойынша су құбыры желісі әр
үйдің қақпасына дейін ғана жеткізілуі тиіс, алайда мердігер компания тұрғындарға қолдау
көрсетіп, барлық үйге суды өз қаражатына кіргізіп берді. Бұл — ауыл тұрғындары үшін
үлкен көмек,- деді Көкпекті ауданының әкімі Ділдабек Оразбаев.
2023 жылы Көкпекті ауданындағы Шұғылбай, Биғаш, Шәріптоғай, Қарамойыл, Ақой және
Мамай ауылдарын «Ақбұлақ» бағдарламасы аясында таза ауыз сумен қамтамасыз ету
жоспарлануда.
Өз тілшіміз
