Семей ядролық сынақ полигоны аумағының бір бөлігі шаруашылық айналымына берілуі мүмкін. Бұл жайында Сенат депутатының сауалына ҚР Премьер-Министрі Әлихан Смайыловтың жауабында айтылған, деп хабарлайды Semeytany.kz ақпараттық порталы ҚазАқпарат қа сілтеме жасап.
«Халық үшін радиациялық қауіп төндірмейтін Семей ядролық сынақ полигоны (СЯСП) аумағының бір бөлігі босалқы жерлер санатынан шығарылып, шаруашылық айналымға берілуі мүмкін. Ядролық қауіпсіздік аймағы СЯСП-тың тарихи шекаралары шегінде болады», — деді Үкімет басшысы.
Премьер-Министрдің атап өтуінше, Мәжіліс қарауында жатқан «Семей ядролық қауіпсіздік аймағы туралы» Қазақстан Республикасы Заңының жобасында СЯСП-тың тарихи шекарасынан тыс жатқан жекелеген аумақтарға кешенді экологиялық зерттеулер жүргізу көзделген. Заң жобасы қабылданғаннан кейін СЯСП-тың кешенді экологиялық зерттеу материалдары белгіленген тәртіппен мемлекеттік экологиялық сараптама жүргізуге жіберілетін болады. Оның нәтижелері бойынша радиоактивті ластануға ұшырамаған СЯСП аумағының бір бөлігін шаруашылық айналымға беру мүмкіндігі айқындалады.
«Осыған байланысты іс-шаралардың белгіленген мерзімдері осы міндетті жүйелі және дәйекті шешу қажеттілігіне байланысты анықталған. Баяндалғанның негізінде жер учаскелерін шаруашылық айналымға беруді жоғарыда аталған Заңды қабылдағаннан кейін және мемлекеттік сараптамалардың нәтижелері бойынша жүзеге асыруды жөн деп пайымдаймыз», — деді Әлихан Смайылов.
Фото: gazeta.cz
