Қазағымызда «Атадан мал қалғанша, тал қалсын» деген жақсы сөз бар. Расымен де саялы ағаш егіп, балаға мирас болатын бұл дәстүр осы уақытқа дейін өз өміршеңдігін жойған емес. Осы мақсатта Абай облысының орталығы Семей қаласында Республика күніне орай ағаш отырғызылды.
Талшын ҚАЛИАСҚАР,
«Семей таңы»
Республика күні мерекесі қарсаңында, Семей қаласындағы аспалы көпір астындағы демалыс орыны, Сәтбаев көшесінің және Би Боранбай көшесінің аумағында ағаш егілді. Аталған іс-шараға Семей қаласы әкімі Нұрбол Нұрсағатов және Абай облысы әкімі Нұрлан Ұранхаев, мәслихат депутаттары және қаланың 200-ден астам белсенді азаматтары қатысты.
Айта кетейік, осыдан бір ай бұрын ашылған аспалы көпір астындағы қоғамдық кеңістік енді жасыл ағаштармен толықты. Уоркаут-алаңқайлар, скейт-парк, паркур алаңдары, фитнес аймақ және балалар ойын алаңдары жасыл желекке оранып, қала көркіне көрік қоса түскендей.
— Семей қаласы кезінде еліміздің ең жасыл қалаларының бірі болған. Енді облыс орталығы статусын алған кезде, шахарды бүрынғыдай жасыл желегі мол, саялы ететін боламыз. Алдағы жылдары бұдан да көп ағаш, бұта отырғызылатын болады, — деп атап өтті өңір басшысы.
— Ағаш егу – ұрпақтан ұрпаққа қалған жақсы үлгі-өнеге. Бұндай үлкен акцияға қатысуымыздың өзі қаламызға атсалысуымызды, оған бей-жай қарамайтынымызды білдіреді. Іс-шараға тек жастар емес, облыс және қала әкімдері, мәслихат депутаттары қатысуда. Қаламыз тек көркейіп, жандана берсін дегіміз келеді, -дейді қала белсенділері.
Жалпы мереке қарсаңында Семей қаласында 478 ағаш, 100 бұта, 2000 жасыл көшет егілді. Атап айтқанда, көпір маңындағы аумаққа – 120 ағаш (үйеңгі тал, алма ағашы — 70 дана, шырша -50 дана), Сәтбаев көшесіндегі аумаққа – 170 ағаш (үйеңгі тал, алма ағашы-120 дана, шырша — 50 дана), Би боранбай көшесі шеңберінде – 100 бұта (бөртегүл -50 дана, бөріқарақат — 50 дана), 188 ағаш (майқарағай — 50 дана, шырша — 138 дана) отырғызылды.
Сондай-ақ, сенбілікте белсенділерге ыстық тамақ және сусындар таратылып, мерекелік концерт өтті.
