Республика күні тек концерттер мен ойын-сауықтық кештерден тұрмады, сонымен қатар қала халқының әлеуметтік жағдайының жақсаруына атсалысқан игі істер жасалды. Осы орайда Абай облысында Республика күні қарсаңында Семей қаласындағы «Қарағайлы» шағын ауданынан 64 отбасыға көпқабатты тұрғын үй пәтерінің кілті табыс етілді.
Бибі ТӨЛЕГЕНҚЫЗЫ,
«Семей таңы»
Қуанышқа толы іс-шараға келген Абай облысының әкімі Нұрлан Ұранхаев жаңа пәтер иелерін қоныс тойларымен құттықтап, алда құрылыс қарқыны өсетіні туралы атап өтті.
— Мемлекет басшысының тікелей қамқорлығымен біздің өңір өзінің даму жолына түсіп келеді. Кешенді жоспар қабылданып, тың жобалар іске асырылатын болады. Біз тұрғын үй құрылысының қарқынын ұлғайтуды жоспарлап отырмыз. Бүгінде қаламыздың бас жоспары әзірленуде. Биылғы жылға қалада қаржыландырудың барлық көздері есебінен 5166 пәтерге арналған 496 415 мың м2 тұрғын үй салу жоспарлануда. Осылайша кезең-кезеңімен баспана санын ұлғайту жоспарымызда бар, -деді облыс әкімі Нұрлан Ұранхаев.
Шаһарымызда баспаналы болған жандар өз кезегін кем дегенде 6-7 жыл көлемінде күткендерін айтады. Оның ішінде көп балалы отбасылар, әлеуметтік осал топ мүшелері, мүгедектер, асыраушысынан айырылғандар, жетім балалар бар.
— Мен өз кезегімді 6 жыл күттім. Өзім банк саласының қызметкерімін, көп балалы анамын. Әрине, кезекті ұзақ күткеніміз бар. Алайда, облыс орталығы болғаннан кейін көпқабатты үйлердің салынып, тұрғын үйге кезекке тұрғандардың баспаналы болғаны өте қатты қуантады, -дейді пәтерлі болған Гүлсім Тұрарова.
Семей қаласының оң жағалау бөлігінде бекітілген бас жоспарға сәйкес «Қарағайлы» тұрғын алабының егжей-тегжейлі жоспарлау жобасы әзірленді. Жоспар бойынша алдағы уақытта 35 мыңнан аса адам тұратын, 227 тұрғын үй салынады.
-Сатып алу құқығынсыз жалға берілетін тұрғын үйді халықтың әлеуметтік осал топтары санатында кезекте тұрғандар алды, олардың 18 – і көпбалалы отбасылар, сондай-ақ 13-і жетім балалар. Бұл тұрғын үйде олар кез-келген уақытта тұра алады. Сондай-ақ, Тәуелсіздік күніне орай тағы 64 отбасыға пәтер кілттері тапсырылады деп күтілуде. Алайда қазір тұрғын үй кезегінде 13 265 адам тұр, — деді Семей қаласының тұрғын үй инспекциясы бөлімінің басшысы Диана Шаяхметова
Қазірде «Қарағайлы» шағын ауданы су құбыры, канализация, телекоммуникация, жылу және электр энергиясының магистральдық желілерімен қамтамасыз етілген.
Шағын ауданда Назарбаев зияткерлік мектебі, 320 орындық балабақша, 5600 орындық «Арена» мәдени-спорттық кешені орналасқан. Бүгінгі таңда жалпы ауданы 253,4 мың шаршы метрді құрайтын 41 үй пайдалануға берілген.
Бірақ мұндай қуанышты оқиғалар тек облыс орталығында өткен жоқ. Баспаналы болған жандардың қатары бұнымен шектелмеді. Мәселен, Үржар ауданы Таскескен ауылында жаңадан салынған 12 пәтерлі алты үй пайдалануға берілді. Пәтер кілттерін аудан басшысы Нұржан Тоқсеитов салтанатты түрде баспана иелеріне табыстады.
Осылайша, Ұлттық мереке ретінде қайта оралған Республика күнін облыс тұрғындары тек қуанышпен қарсы алды.
