Республика күні – Тәуелсіздігімізді ұлықтайтын мереке. 25 қазан – ұлттық мереке мәртебесінде алғаш аталып өтілді. «Республика күні еліміздің мемлекетке деген батыл қадамының нышаны болуы тиіс. Бұл күні тәуелсіздікке қол жеткізуге зор үлес қосқан ұлттық қаһармандарымыз құрметтелуі керек», — деді Мемлекет басшысы. Бұл күн – елімізге еркіндік сыйлаған, ата-бабамыз аңсаған арманның жүзеге асқан Ұлы күн. Ұлттық мереке жоғарғы деңгейде түрлі шаралармен аталып өтілді. Солардың бірқатары қала музейлерінде шаһар тұрғындары мен қонақтарына арналып ұйымдастырылды.
Дана Талғатбек,
«Семей таңы»
Семей қаласының облыстық тарихи-өлкетану музейінде «Ашық есік күні» акциясы өтті. Музей экспозицияларын үш жүзден астам келушілер тамашалап, тарихи жәдігерлермен танысты. Келушілер музей мамандарына сұрақтарын қойып, қызықтырған сауалдарына жауап алды. Мейрам күні музей қонақтарының қатарында Абай облысының әкімі Нұрлан Ұранхаев та болды. Сондай-ақ өлкетану музейінде атаулы мерекеге орай ұйымдастырылған шаралардың қатарында «Ұлттың тарихи қазынасы» тақырыптық дәрісі мен «Гүлдене бер, менің Қазақстаным» викториналық ойыны бар.
«Абайдың «Жидебай-Бөрілі» мемлекеттік тарихи-мәдени және әдеби мемориалдық қорық-музейінде «25 қазан – Республика күні» атты кітап көрмесі ұйымдастырылды.
Кітап көрмесіне Қазақстанның қалыптасуы мен дамуының негізгі кезеңдері, ішкі және халықаралық аренадағы экономикалық және саяси жетістері туралы кітаптар қойылды. «Жидебай-Бөрілі» музей-қорығының директоры Тұрдықұл Қасенұлы Шаңбай барша келушілерді тарихи маңызы зор мерекемен құттықтады.
— 25 қазан Республика күні ретінде қайта бекітіліп, Президент тиісті заңға қол қойды. Бұл тарихи және өте маңызды шешім. Рухани құндылығымызды, қазақы қайсар рухымызды, бай тарихымызды, бабадан қалған даланың мұрагері ретінде алты алашты әлемге таныту арқылы осы тарихи датаның біз үшін қасиеттілігін көрсете білуіміз қажет.
Бұл дата тарихи бағасын әлдеқашан алып қойған. Алайда осы жылдан бастап қайта түлеп, жаңғырып, ұлтымызды ұлықтайтын мерекеге айналғаны көңіл қуантады.
Сіздерді Республика күнімен шын жүректен құттықтаймын! Қыран құсы қалықтаған көк аспанымыздың астында баянды да бақытты ғұмыр тілеймін. Еліміз гүлденіп, көркейе берсін! — дейді «Жидебай-Бөрілі» музей-қорығының директоры
Тұрдықұл Қасенұлы.
Республика күні Невзоровтар отбасы атындағы облыстық бейнелеу өнері музейінде де аталып өтті. Музейдің барлық келушілеріне «Сүйікті қалам» атты қала суретшілерінің көрмесі ұйымдастырылса, қаламыздағы №30 орта мектеп оқушыларына музей ұжымы шығармашылық іс-шара өткізді. Оқушылар «Тұмар» атты шығармашылық сабақта тек қол икемдерін дамытып қана қоймай, экран арқылы музей қызметкерлері дайындаған қызықты бейнероликтерді тамашалап, танымды мәлімет алды. Ата салтын сақтап, әдет-ғұрыпты ұстануда мұндай сабақтардың өткізілуі оқушылар үшін маңызы зор. Шығармашылық сабақ соңында әр бала өз қолымен жасаған тұмарын үлкен қуанышпен өздерімен бірге ала кетті.
Достоевскийдің әдеби-мемориалдық музейінде «Восток» өңірлік қолбасшылығының әскери қызметшілерінің қатысуымен Республика күніне арналған дөңгелек үстел өтті. Осы мереке аясында әдеби-мемориалдық мұражайда Семейде мерзімді қызмет өткеріп жатқан сарбаздарға тәуелсіз Қазақстан тарихын қалыптастырудағы қаламыздың ерекше орны туралы мағлұмат берілді. Соңында қаланың көрнекті жерлеріне виртуалды экскурсия ұйымдастырылып, әскери қызметшілер Достоевский музейінің экспозицияларын аралады.
