Бүгінде шаһарымыздағы жастардың сүйікті орнына айналған жер – арбат. Бұндай арбат Астанада, Алматыда, Шымкентте де бар. Алайда, Семей арбатының ерекшелігі – оларға қарағанда кеш қолданысқа берілуінде.
Талшын ҚАЛИАСҚАР,
«Семей таңы»
Аз ғана уақыт ішінде аталған орында шығармашыл адамдар үнемі жиналатындығымен танымал бола бастады. Бір шетінде ән шырқалса, енді бір жерінде қылқаламымен сурет салып отырған жастарды көресіз. Осындай ортада тек жастар ойын-сауық құрып қана қоймай, мерекелік концерттер де өтеді.
25 қазан Республика күнінде Семей арбатында айтулы іс-шаралар өтті. Мерекелік концерт пен түрлі көрме ұйымдастырылған шараға қала әкімі Нұрбол Нұрсағатов қатысты. Алаңның ортасында орналасқан сахнада Достық үйі, Мәдениет үйінің өнерпаздары өз өнерлерін көрсетіп, халық билерін билеп, қазақ, орыс, украин әндері шырқалды. Жиналғандар арасынан бүлдіршіндер асық атып, мергендіктерін дәлелдеу мақсатында бақсынасты.
— Асықты менің әкем жақсы ойнаған. Бізге атадан-балаға мұра болып қалған ұлттық ойынымыз. Асық ату арқылы мергендікке үйренеміз. Осындай іс-шаралар қаламызда бола берсе екен, -деді шаһарымыздың жас тұрғыны Әли Баймұхаметов.
Сонымен қатар, арбатпен бойлай келе жатып көзіңізге көрме түседі. Суретшілердің туындылары қойылған көрмеде қала бейнесі суреттелген. Оған қоса, ұлтымыздың қалыптасуына атсалысқан Ахмет Байтұрсынұлы, Әлихан Бөкейхановтың өмірбаяндарынан сыр шертетін көрме қойылған.
— Бүгінгі күнді ақ түйенің қарны жарылған деп айтар едім. Облыс болғалы біздің көңіліміз көтеріңкі. Бұндай мерекені қанша жыл күттік. Жастарымызға, немерелерімізге осындай шуақты күнді көру бұйырғанына қуаныштымын, -деді «Ахау Семей» қазақ ұлттық құндылықтарын қолдаудың орталығы» қоғамдық бірлестігінің төрайымы Жұматаева Гүлжихан.
Қала тұрғындары мен қонақтары көңіл көтеріп, ән салған іс-шара жоғары деңгейде өтіп, халық қарасы көп болды.
