Республика күніне орай, Абай театрында облысымызда қоғамның әр саласында жемісті еңбек етіп жүрген азаматтарды марапаттау рәсімі өтті. Салтанатты кешке Абай облысының әкімі Нұрлан Ұранхаев және аймағымыздағы мемлекеттік мекеме, басқарма, бөлім басшылары мен қызметкерлері, ардагерлер және кәсіпкерлер қатысты.
Биыл елімізде 13 жылдан кейін алғаш рет Республика күні тойланып жатыр. Бұл күн мерекелер қатарынан алынып тасталғанымен, биылғы жылдың 16 маусымында Ұлытауда өткен Ұлттық құрылтайда Қазақстан Президенті Қасым-Жомарт Тоқаев Республика күніне ұлттық мереке мәртебесін қайтаруды ұсынды. Қыркүйек айының ортасында Қазақстан Республикасының Парламенті «Қазақстан Республикасындағы мерекелер туралы» заңға түзетулер енгізді. Құжатқа сәйкес, Республика күні, яғни 25 қазан – ұлттық мерекеге, ал Тәуелсіздік күні — 16 желтоқсан мемлекеттік мерекеге айналды. Салтанатты кеште Абай облысының әкімі Нұрлан Ұранхаев жиналғандарды мерекемен құттықтады. — Ардақты ағайын, қадірлі жерлестер! Баршаңызды Ұлы даламыздың ұлттық мерекесі, егемендік арқауы болған Республика күнімен құттықтаймын! 1990 жылы азаттыққа бет бұрған еліміздің жаңа тарихы жазыла бастады. Бұл көп ұлтты халқымыздың Тәуелсіздік жолындағы тұңғыш тағдыр шешті қадамы болатын. 2009 жылға дейін Республика күні ұлттық және мемлекеттік мереке ретінде аталып келді. Араға он үш жыл салып ел Президенті Қасым-Жомарт Кемелұлы Тоқаевтың бастамасымен ұмыт болған мейрамға ұлттық мәртебе берілді. Республика күні Қазақстанның тарихына басты мереке ретінде енді. Бұл — еңсесі биік егемендік пен елдіктің, рухы асқақ азаттық пен тәу етер Тәуелсіздіктің салтанаты. Осынау мерекені Абай елі зор қуанышпен, болашаққа деген үлкен сеніммен қарсы алуда. Халықтың қалауымен, Президент шешімімен дүниеге келген Абай облысы бүгіннің өзінде республикамыздың маңызды аймақтарының біріне айналуда. Өңірдің әлеуметтік-экономикалық мәселелерін жедел шешіп, тұрғындардың әл-ауқатын арттыру мақсатында нақты тапсырмалар іске аса бастады. Инвестицияның тартылуына, өнеркәсіп пен жұмыс орындарының ашылуына, шағын және орта бизнестің дамуына жағдай жасалуда. Аймақты республикалық бюджеттен тікелей қаржыландыру жүзеге асады. Бір сөзбен айтқанда, біздер тарихи әділдіктің салтанат құруының куәгері болдық. Ынтымақ пен бірлікке ұмтылып, татулық пен достықты адастырмас темірқазыққа айналдырған қасиетті Семей елі Президент тапсырмалары аясында көркея түседі деп сенемін,- деді облыс әкімі Нұрлан Ұранхаев. «Парасат» орденімен еңбек арадагері Болат Сапоров, Невзоровтар отбасы атындағы бейнелеу өнері музейінің директоры Татьяна Стромская, Жарма аудандық Мәдениет үйінің директоры Аманжол Дауытов, «Құрмет» орденімен Республикалық «Абай Құнанбаев» қоғамдық қорының президенті Отантай Кәрібжанов, Қазақ күресі ассоциясының вице-президенті Баделхан Камалханұлы, Үржар ауданының №2 ауруханасының бас дәрігері Нағима Жақиянова, еңбек ардагері Айгүл Иманғалиева (Ақсуат ауданы), жеке кәсіпкер Рафаиль Хазипов, Семей қаласының мамандандырылған әкімшілік сотының судьясы Ғибрат Валиев, мүсінші Нұрбол Қалиев, «Раушан» ЖШС директоры Талғат Оразаев (Бородулиха ауданы), Абай облысы денсаулық сақтау басқармасының басшысы Марат Сандыбаев, ІІІ дәрежелі «Еңбек даңқы» орденімен «Талап» шаруа қожалығының механизаторы Қайрат Шалқыбаев (Көкпекті ауданы), ІІ дәрежелі «Барыс» орденімен М.Әуезов атындағы педагогикалық колледж директоры Шағангүл Жанаева, «Ерен еңбегі үшін» медалімен «Коростелевское» ЖШС директоры Ерлан Ертаев (Бородулиха ауданы), «Азамат» шаруа қожалығының директоры Асқар Данабаев (Бесқарағай ауданы), «Диас» шаруа қожалығының жетекшісі Қанатбек Жанұзақов (Ақсуат ауданы), Үржар аудандық дене шынықтыру және спорт бөлімінің басшысы Сәрсенхан Қабдолданов, Жарма ауданының ішкі саясат бөлімінің басшысы Мәулетбек Матанов, еңбек ардагері Слямбек Мұқашев (Көкпекті ауданы), «Рүстем» шаруа қожалығының басшысы Рүстем Садуов, Әміре Қашаубаев атындағы мемлекеттік филармония әншісі Баян Сағынбаева, Бесқарағай ауылдық округінің әкімі Юрий Слоницкий және басқа да азаматтар, «Шапағат» медалімен еңбек ардагері Молдабек Жанболатов (Семей қаласы), «Талап» шаруа қожалығының басшысы Жұмабек Күшікбаев (Көкпекті ауданы), Көкпекті аудандық аруханасының дәрігері Оралбек Тоғасбаев марапатталды. Сондай-ақ қатар бірқатар азаматтар Қазақстан Республикасының Құрмет грамотасына ие болды. Жиын соңында барлық марапат иелері естелік суретке түсіп, мерекелік концертті тамашалады.
Жадыра ТӨЛЕГЕНҚЫЗЫ,
«Семей таңы»