Cемей қаласының Қоғамдық кеңесінің кезекті отырысына қала әкімі Нұрбол Нұрсағатов қатысып, жаңадан тағайындалған кеңес мүшелерімен танысты. Шаһар басшысы кеңес мүшелерінің сұрақтарына жауап беріп, бірқатар мәселелерді бірлесе талқылады. Орталық саябақты абаттандыру, жаңа қоқыс полигонын, дағдарыс орталығын салу, Знаменка тас жолы бойындағы зират аумағын шектеу, қалаішілік автобустардың санын көбейту, қала көшелерін жарықтандыру — кеңес мүшелері жиын барысында осы мәселелерді көтеріп, шешу жолдарын талқылады. — Қоғамдық кеңес халық пен билік арасындағы көпір іспетті. Біз сіздердің ұсыныстарыңызды тыңдауға дайынбыз. Қаламыздың көркеюі үшін депутаттармен, қоғамдық кеңес мүшелерімен бірлесе отырып игі істер атқарамыз деп сенемін,- деді шаһар басшысы. Қоғамдық кеңеске қатысқан қала әкімінің орынбасарлары биылғы жылы жүзеге асқан жобаларға тоқталып, алдағы жоспармен таныстырды. Айта кетейік, қала әкімі мен Қоғамдық кеңес мүшелерінің келесі отырысы желтоқсан айына жоспарланып отыр.
З.ТӘТТІМБЕТҚЫЗЫ,
«Семей таңы»
