Қалалық Мәдениет сарайында Семей қаласының арнаулы әлеуметтік қызметтер көрсету орталығының ұйымдастыруымен «Екі жұлдыз — 2022» облыстық шығармашылық фестивалінің гала-концерті өтті. Жыл сайын өткізілетін бұл дәстүрлі іс-шараға мүмкіндігі шектеулі балалар мен жасөспірімдер қатысады. Биылғы фестиваль Мүгедектер күні мен Балалар жылына орай ұйымдастырылды.
Дана ТАЛҒАТБЕК,
«Семей таңы»
Фестивальға Жұмыспен қамтуды үйлестіру және әлеуметтік бағдарламалар басқармасының басшысы А.Сұлтанова, аудандар мен қаланың аумақтық орталықтарының басшылары, үкіметтік емес ұйымдардың өкілдері, демеушілер, мүгедектігі бар балалардың ата-аналары мен балалар шақырылды.
— Мүмкіндігі шектеулі балалар мен жасөспірімдердің қатысуымен өтетін «Екі жұлдыз» облыстық шығармашылық фестивалін жыл сайын ұйымдастырамыз. Бұл іс-шараның ерекшелігі – мүгедектігі бар жандар түрлі конкурстардың лауреаттарымен, дипломанттарымен, Қалалық Мәдениет сарайының кәсіби әртістерімен жұптасып өнер көрсетеді. Бүгін қалалық, аудандық деңгейдегі сайысқа қатысқан 30 мүгедектігі бар жандардың арасынан іріктелген 12 жүлдегердің өнерін тамашаладық, — дейді Абай облысы Семей қаласының арнаулы әлеуметтік қызметтер көрсету орталығының басшысы Рымжан Тынысова.
Гала-концертте Абай, Ақсуат, Аягөз, Бесқарағай, Жарма, Көкпекті, Бородулиха, Үржар аудандарының арнаулы әлеуметтік қызмет көрсету орталықтары мен мүмкіндігі шектеулі балаларға және 18 жастан асқан мүгедектерге үйден қызмет көрсету бөлімшелерінің, сондай-ақ Семей қаласындағы «Асыл» қоғамдық бірлестігінің өкілдері өнер көрсетті.
— «Екі жұлдыз» фестивалі алғаш рет біздің орталықтың бастамасымен 2014 жылы ұйымдастырылды. Ал 2018 жылдан бастап Семей қаласы әкімінің қолдауымен облыстық деңгейде өткізіліп келеді. Бұл іс-шараның негізгі мақсаты – мүмкіндігі шектеулі жандарды ортаға бейімдеу, өмірге деген қызығушылықтарын арттыру, дарындыларды анықтап, олардың өнерін халыққа паш ету, — дейді орталықтың әлеуметтік қызметкері АнарУстановить изображение записи Толымханқызы. — Бұл шара тек концертпен шектелмейді, Мәдениет сарайының фойесінде арнаулы әлеуметтік қызметтер көрсету орталығының қызмет алушыларының шығармашылық жұмыстарының көрмесі ұйымдастырылды, алдыңғы байқаулардан естелік сәттер — фотосуреттер қойылды, — дейді Анар Толымханқызы.
Көрермен назарына қалалық орталықтың қызмет алушылары жайлы Қазақстанның еңбек сіңірген қайраткер Мапруза Утуленова, республикалық сайыстардың лауреаты Әсия Әлімханова, халықаралық сайыстардың лауреаты Нұрлан Тутуновтың орындауындағы «Главное на свете – это наши дети» әніне түсірілген бейнефильм ұсынылды.
«Екі жұлдыздың» гран-при жүлдесін аягөздік Темірлан Төлеуғазы мен семейлік Еркеназ Нұрғазы жеңіп алды. І орынды Айлин Узбеканова (Жарма ауданы), Темірлан Кулекенов (Көкпекті ауданы), Сабина Жанболатова (Бесқарағай ауданы) иеленді. ІІ орынды Артем Дюсупов (Көкпекті ауданы), Нұрәділ Еркін, Мөлдір Тыныбекова (Үржар ауданы) қанжығаларына байласа, ІІІ орынды Ақниет Қасенова (Үржар ауданы), Жұлдыз Жамбылқызы (Семей қаласы), Айдана Тұрсынова (Үржар ауданы), Балнұр Оразғалиева (Абай ауданы) иеленді.
Барлық қатысушылар мен олардың тәлімгерлері дипломдармен марапатталып, жеңімпаздарға бағалы сыйлықтар табысталды. Гала-концерт қатысушылардың орындауындағы фестивальдың символына айналған «Екі жұлдыз» әнімен қорытындыланды.
