Қала жолдарын қалыпқа келтіру жыл сайын қарқын алып, семейліктердің тақтайдай тегіс жолмен жүруіне жағдай жасалуда. Бұл тұрғыда, әсіресе, жергілікті билік өкілдеріне темір тұлпар тізгіндегендердің айтар алғысы шексіз. Семейде қаланың шет аймақтарымен байланыстыратын жолдардың жылдар бойы жөндеу көрмегені көпшілікке мәлім. Міне, соңғы жылдары қаланың шет аймақтарындағы елеусіз жолдар ескеріліп, жөнге келе бастады. Біраз жылдан бері қараусыз қалған осындай көшелердің қатарында Морозов және Дальняя көшелері де бар. Қала әкімі Айбек Кәрімов өткен сенбі күні аталған екі көшеде жүргізіліп жатқан жол жөндеу жұмыстарының барысымен танысты.
Морозов көшесіндегі орташа жөндеу жұмысын жасап жатқан мердігер «Гордорстрой» мекемесі. Бүгінгі таңда бұл жердегі жоспарланған шаруалардың басым бөлігі атқарылған. Асфальт — бетон жабынын ауыстыру жұмыстары аяқталып қалған. Сондай-ақ, айдың соңына дейін жаяу жүргіншілер жолын жасап, жиектастар мен аялдама павильондарын және алаңқайларын орнату жоспарланып отырған көрінеді. Жалпы, көшенің 3 шақырымдай жолы тегістеліп, асфальтталады.
— Морозов көшесіндегі жолдың транзиттік маңызы артып келеді. Бұл жол арқылы Ресейге шығатын көліктер қатынайды. Сондықтан, бұл жерде жөндеу жұмыстарын жүргізу үлкен мәнге ие деп ойлаймын. Көшедегі көлік қатынасының қарқыны жоғары, — дейді Морозов көшесіндегі жолды жөндеудің маңызы жайлы «Гордорстрой» мекемесінің басшысы Бауыржан Қайрамбаев.
{jcomments on}Сондай-ақ, «Гордорстрой» мекемесі Дальняя көшесінде күрделі жөндеу жұмыс-тарын жүргізіп жатыр. Жоспарға сәйкес асфальт қабаты толық ауыстырылып, жауын — шашынға қарсы арнайы кәріз жүйесі салынбақ. Яғни, жолдың беті тегістеліп қана қоймай, көлік қатынасына қиындық туғызатын жаңбыр суының жиналып, көлшікке айналуы сияқты мәселе шешімін табады деген сөз. Бұл мақсатта, сондай-ақ, 220 метрдей жерде батпақты топырақ қазылып алынып, орнына құм мен қиыршық тас қоспасы салынған. Қазіргі таңда Дальняя көшесіндегі күрделі жөндеу жұмыстарының 20 пайыздайы атқарылған, жыл соңына дейін аяқтау жоспарланып отыр.
Қала әкімі Айбек Кәрімов қос көшедегі жөндеу жұмыстарымен танысып, бұл бағыттағы шаруалардың сапасына байланысты бірқатар жайттарға тоқталып өтті. Дәлірек айтқанда, бір рет жөнделген жерге келесі жылы қайта айналып келмейтіндей етіп жасау керектігін ескертті. Бұл орайда, мердігер компания өкілдері Морозов көшесі бойынша жолдың сапасына 3 жылға дейін кепілдік берсе, Дальняя көшесіндегі жолдың 5 жылға дейін жақсы қалыпта сақталатынын айтты. Ол үшін төселетін асфальтті тексеруден өткізетін арнайы зертхана мен мамандар құрамы жұмыс істеп жатқан көрінеді. Сондай-ақ, Айбек Мүталапханұлы абаттандыру мен жарықтандыру мәселелеріне назар аударып, шаһар келбетін бұзатын дүңгіршектерді алып тастау қажеттігін тілге тиек етті.
Шаһар басшысы алдағы уақытта да жолдарды жөндеу бойынша бірқатар шаруалардың жоспарланып отырғанын айтты. Жалпы алғанда қала әкімі жұмыстың қарқынына көңілі толатынын жеткізіп, барлық шаруалардың уақытында атқарылуы тиіс екендігін атап өтті.
Мирас ҚҰСАЙЫН,
«Семей таңы»
