Қаламызда «Asar Joly» атты қайырымдылық марафонына байланысты баспасөз-конференциясы өтті. Жиынға еріктілер, блогерлер, БАҚ және қоғам өкілдері қатысты. «Asar Ume» қор негізінде бастау алған бұл марафон ұйымдастырушылары еліміздің 20 өңірін аралауды мақсат еткен. Қайырымдылық тур бастамашылары мұқтаж жандарға баспана беріп, қиыншылықта жүрген отбасыларға қол ұшын созып қана қоймай, жұмыспен, біліммен, сондай-ақ кәсіппен айналысуға да жәрдемдесуде.
Дана ТАЛҒАТБЕК,
«Семей таңы»
«Asar Ume» – тұрмыстық жағдайы төмен және қиын жағдайға тап болған көп балалы отбасыларға тұрғын үй алуға, жастарды жұмысқа орналастырып, оқуға, бизнеспен айналысуға көмектесетін қоғамдық қор. Жоба негізінде көп балалы отбасыларға, оның ішінде дамуында ерекшелігі бар бала тәрбиелеп отырған отбасыларға басымдық беріледі. Бүгінде қор еріктілер, кәсіпкерлер, жұмысшылар мен белсенді азаматтарды жақсылық жасаудың айналасында біріктіруде. Қор құрылған 3 жыл ішінде Қазақстан бойынша үш миллионнан астам адамды біріктіріп, еліміздегі аз қамтылған 500-ге жуық отбасының, оның ішінде 2600 балалардың баспаналы болуына ат салысқан. Жиында қайырымдылық марафонының бүгінгі күнге дейін атқарған игі істері жайлы «Asar Ume» қорының сыртқы байланыс және коммуникациялар бойынша менеджері Серік Қамбарбаев бөлісті.
— Асар – ата-бабамыздан келе жатқан салт-дәстүріміз. Осы жобамыз арқылы біз еліміздің түкпір-түкпіріндегі жаңашырларды біріктіреміз. Қор негізінде бастау алған «Asar Joly» қайырымдылық марафоны республикалық деңгейде осы жылдың шілде айынан бастау алды. Сол уақыттан бері еліміздің әр қаласын аралап шығу жоспарда бар, Семей марафон аясындағы он бірінші қала болып отыр. Біздің қатарда мыңдаған ерікті адамдар бар, біз оларды «батырлар» деп атаймыз. Олардың арасында қарапайым адам да, қоғам қайраткерлері, кәсіпкерлер де бар. Осы уақыт аралығында халықпен бірге үлкен жетістіктерге жеттік. Жоба аясында 30-ға жуық көп балалы отбасыларды үймен қамтамасыз етсек, 30-35 көп балалы отбасы балаларын оқуға, сондай-ақ кәсіппен айналасуға мүмкіндік жасадық. Біз көмек көрсеткен әр адам өз аяғына нық тұрғанын қалаймыз, сондықтан тек баспанамен қамтамасыз етпей, ары қарай да дамуына септігімізді тигіземіз, — дейді Серік Қанатұлы.
«Asar Joly» марафон аясындағы форум қаламызда 3 қараша өткізіледі. Оның барысында ұйымдастырушылар әлеуметтік көмекке мұқтаж отбасылар мен балаларға басқа қалалардан арнайы әкелген сыйлықтар табыстамақ.
— Бұл форумның мақсаты – ашық жүректі, ниеті таза, жақсылық жасағысы келетін барлық жандардың басын біріктіру. Қуанышымызға орай, бұл қайырымдылық марафонның арқасында біздің қорымыз жаңа еріктілермен толығып, еліміздегі үлкен қозғалысқа айналуда, — дейді қайырымдылық қорының бөлім директоры Бауыржан Амангелдіұлы.
Қайырымдылық қор ұйымдастырушылары «Asar Joly» қайырымдылық марафоны өскелең ұрпақтың рухани-адамгершілік тәрбиесін қалыптастыруға, нығайтуға, ел халқының мәдениеті мен дәстүрлерін насихаттауға бағытталған жастардың қоғамдық пайдалы бастамаларын қолдау мақсатында өтіп жатқандығын алға тартады.
